Jowai, Ïaïong 01: Ka Seiñ Raij Jowai kumba long manla u snem kan pynlong ïaka ‘Shad Sukra’ ka ban sdang haka 6 bad pynkut haka 7 tarik u Ïaïong, 2024 kane ka Shad Sukra ka long shi bynta ka jingainguh ïa ka mei mariang hashwa ban leit hiar rep sha ki hali ki pynthor.
Ha kane ka snem yn wan ïadonlang da ki waheh wasian jong ki 12 tylli ki dong, ki kyntoid, kynthup ïa ka Sengtyllilang jong ka Seiñ Raij Ummulong bad Seiñ Raij Shillong. Na ka liang u Vice Chancellor jong ka skul bah NEHU un long kum u kongsan, ha ryngkat ka kong Silbi Passah kaba la ïoh ïa ka Padma Shri award nalor kiwei kiwei de.
Ha ka por mynstep 10 waje jong ka 7 tarik kan don ka jingthang ïaka sharak ha Mynkoi Pyrdi Iongpiah nangta kin leit sha madan Biar ka Blai bad leit mih sha Iawmusiang ban pynlong ka jingshad Sukra ha ryngkat ki riam tynrai. Katba ha ka por janmiet kan don ka shad “per syntu pyllah” ha kaba ki dong bapher bapher kin ïashim bynta lang.
U Chairman ka Arts & Culture ka Seiñ Raij Jowai ma Chandlok Dkhar ula ong ïa ka Shad Sukra la ju pynlong naduh ki por ki longshwa manshwa ha ryngkat ka ñiam ka rukum kaba don shwa ïa ka Thoh Lyngdoh.
Ula ong lyngba ka riam ki beit jong ki nongïashim bynta ha ka Shad Sukra ka lah ban pynpaw pyrthei ïaka jingriew spah ka riti dustur la jong.
Ha kane ka Shad Sukra haka sngi nyngkong 6 tarik kan don ka jinglehkai Drama ban pynpaw pyrthei ïa ki sap ki phong ïa kaba yn pynlong ha Tpep-Pale Jowai.
Ka phang jong kane ka Shad Sukra mynta u snem ka ong ‘kiba tip ban kohnguh ïa ki adong Blei ka long ka luti ka jingsuk ha sla pyrthei’. Ka Seiñ Raij Jowai ka kyntu kumjuh ïa ki paidbah ban wan biang por haka step jong ka 7 tarik ha kaba yn don ki jingkren na ki riew rangbah bad ki jingshad bapher bapher.
