Kum u biskot dei ban pur kylleng da kaba skhem ha la ka tynrai : Sahitbor Diengngan

Nongstoiñ, Ïaiong 01: Hadien ki bun phew tylli ki snem naduh ba la seng ïa ka skul St Mary’s ha ka shnong Maweit kaba dei kawei na ki shnong kaba dang sahdien ha ka thaiñ jong ka West Khasi Hills District, ha ka sngi nyngkong jong ka taiew katei ka shlem ka la ïoh ban lum lang ïa ki khynnah samla kiba la pass bad kiba dang ïai bteng ki jingpule ha katei ka shlem kumjuh ruh ïa ki nonghikai kiba rim kum ka jingïakynduh lang ïa kaba la tip ruh kum ka Alumni Gathering.
Ha kane ka sngi la ïoh ruh ban plie paidbah biang sa shisien ïa ka Ïing skul barim kaba la ïoh ban pynkylla noh mynta tang sha ka primary. Katei ka Shlem ka dei kaba la seng naduh u snem 1992 lyngba ka kynhun I Sister Helen bam kwai ha ïing u Blei bad mynta ka la don la ka ïing paka kaba heh bad kaba bit kaba biang haduh class X.
Ka dei ruh kawei na ki skul kaba la pynmyntoi shibun ïa ki nongshong shnong jong katei ka thaiñ, kaba la sei ruh bun ki soh kynthup haduh 2 ngut ki nongïasaid aiñ, 17 ki shipai bad pulit, 30 ngut ei ei ki nonghikai kynthup kiba hikai ha ki skul sorkar, ki Nurse, ki Missionary, kiba treikam sorkar bad kiwei kiwei.
U bah Sahitbor Diengngan Branch Manager ka HDFC Bank Nongstoiñ, u la long u kongsan ryngkat u bah Orius Thongni kum u symbud kongsan, nalor u Liavi David Principal ka St. Mary’s bad kiwei kiwei ki riew rangbah jong ka thaiñ. U kongsan haba ai jingkren u la ong dei namar ki nonghikai mynshuwa ba la long kumne kumba long mynta. Kumta ka dei ka kamram ki khynnah Alumni ban wad ïa la ki nonghikai kiba la pynlong ïa ka mynta. U la ong ruh ban kynmaw ruh ban ym klet ïa la ka tynrai kum u jingthung Biskot ban pur kat shaba poi ban soh tangba dei ban tip ïa la ka tynrai hangno ka don.