Nongstoiñ, Ïaiong 01: Da ki phew tylli ki Ïing bad bun tylli ki Shnong ka thaiñ Ri-Muliang, West Khasi Hills, ki la shah ktah jur ha ka eriong erngit kaba wan ban lynshop kynsan kynsan ha ka janmiet sngi U Blei ka 31 tarik Lber 2024.
Kane ka eriong kaba la wan ha ryngkat u slap u ba jur, ka la pynjulor buh eh ha ka thaiñ Langpih, Tynghor, Umyiap bad kiwei kiwei ki shnong ba marjan. Ki khubor ki ïathuh ruh ba ka eriong ka la pynkhyllem ruh ïa ki post bording bad ki dieng ki siej ha ka thaiñ. La ong ba ki don ruh katto katne ki briew kiba la mynsaw na kane ka jingjia.
Ha ka jingïakren bad u President ka HYC Ri-Muliang Pyllun samla Distarbor Wanniang, u la ong ba ka seng ka dang pyrshang ban lum jingkheiñ mynta ïa ki jingpynjulor jong kane ka eriong ha ka thaiñ baroh kawei.
U la ïathuh ruh ba tang ha ka shnong Tynghor, ki la don haduh 15 tylli ki Ïing kiba la shah pynjulor bad shah jynrat ka tnum ha kane ka eriong. Kumta ym lah satia ban tip lut ïa ka jingshah pynjulor jong ki ïing ki sem ha kiwei kiwei pat ki shnong ba marjan.
