Julor 68 ki longïing na ka jingwan lynshop u phria ha ka thaiñ Warsan Lyngdoh

Mawkyrwat, Ïaïong 01: Ka long kaei kaei ka jingduh nong kaba khraw namar da ka jingwan jong ‘erïong ‘erlang tharai ha ka miet jong ka 31 tarik u Lber, 2024 kiba bun tylli ki longïing ki la shah ktah bad shah pynjulor.
Ha ka tyllong khubor ba la ïoh lyngba ka ophis jong u District Disaster Management Office (DDMO), South West Khasi Hills District la ïathuh ba ha kane ka jingwan jong ka phria ryngkat ka ‘erïong ‘erlang tharai ki don haduh 68 tylli ki longïing kiba la shah ktah jur na ka jingshah shoh phria ïa ki tnum ïing bad 39 tylli pat kiba la shah ktah tang malu mala bad kine ki longïing ki dei ha ka thaiñ Warsan Lyngdoh kiba hap hapoh jong ka Mawkyrwat Block South West Khasi Hills District.
Shuh shuh la ïathuh ba ki shnong kiba la shah ktah na ka jingwan ka ‘erïong ‘erlang tharai ki long ka shnong Mawjaraiñ, Nongrim Mawpat, Pynden umjaraiñ, Umsaw, Nongtynñiaw, New Mawjai, Nongpuiñskei, Mawnore, Mawhiangrnga, Mawkhlaitngap, Mawpat, Rangmaw, Mawsaw, Manad, Phlangdiloiñ, Wahkaji.
Ha kawei pat ka jingjia, ha kajuh hi ka miet jong ka 31 tarik u bnai Lber, 2024 da ka jingwan u slap bad lyer kaba jur kawei ka skul kaba kyrteng ka Vesto Upper Primary School kaba don ha shnong Rangjadong ka la shah lit noh ki tin sop bad la don ki ïing briew bad ki dukan kiba la shah pynjulor malu mala.
Shuh shuh la ïathuh ruh ba ha kine ki jingjia ym shym la don mano mano ruh ba mynsaw.