Nongpoh, Ïaïong 01: Da ki phew tylli ki Ïing ki sem ha ka thaiñ khappud Block II ha Ri Bhoi ki la shah punjulor ha ka erïong kaba la wan lynshop ha ka janmiet Sngi U Blei kumba ha ka por 4 baje janmiet.
Kumba la ioh lum jingtip la ong ba kane ka erïong bajur ka la lynshop ym tang ïa ki ïing ki sem ha kitei ki thaiñ khappud Block II bad danki phew tylli ki Ïing ha ka thaiñ Jirang ruh ki ïing ki sem ki la shah punjulor bad ha kiwei kiwei ki bynta jong ka dong Ri Bhoi
Haba phai sha ka jingjoa ha ka thaiñ Block II bad hap ha ka Raid Nongtung ha Ri Bhoi, ki lai tylli ki Shnong ki la shah kthah bha ba kynthup ïa ka Shnong Ummat I, Ummat II bad ka Shnong Nongsder ha kaba 28 tylli ki ïing ki la shah punjulor ha ka erïong erngit ha kitei ki 3 Shnong.
Halor kane ka jingjia ba sngewsih bun ruh ki longïing ki la kylla khlem ïing khlem sem ha kaba katei ka erïong bajur ka la wan ban punjulor ïa ki ïing ki sem bad baroh ki jingdon jingem jong ki hapoh ki ïing ki sem.
La ong ruh ba kane ka eriong ym tang ba ka punjulor ïa ki ïing ki sem, hynrei bun ki jingthung jingtep ruh ki la julor ba la don ruh ka jingïap phria ha ka thaiñ Ri Bhoi.
Haba ioh ban ïa kren bad u Bah Blikshon Sohtun, President ka Synjuk ki Rangbah Shnong Border Area ka Raid Nongtung, u la ong ba kane ka jingwan lynshop kynsan ka erïong ka la ktah shisha ïa kiba bun ki Longïing longsem ha katei ka thaiñ bad ki la kylla long khlem ïing khlem sem ba ka eriong ka la pynjot pynpra ïa ki ïing ki sem jongki.
Ha kaba ïa dei bad kane ka jingjia kum u nongïalam katei ka thaiñ u la pynpaw ka jingsngewkhia ban iohi ba ki longïing ki la shah ktah jur bad don ruh kiba la hap ban wad jaka riehtngen shipor namar ba ka ïing jongki kam long shuh ban shong ban sah na ka jingwan lynshop katei ka eriong bajur.
Namar kata na ka liang ka Synjuk bad ki nongïalam Shnong ki la buh ïa ka jingkyrpad sha ka bor sorkar ba kin phah ban wan jurip mardor ïa ki longïing kiba shah ktah bad ha kajuh ka por ban thaw lem ïa ki lad jingïarap na ka sorkar sha kitei ki lanot kiba la shah ktah jur ha katei ka erïong, u la bynrap.
