Nongpoh, Jymmang 29: Ka BJP party ha kane ka kynti ka la sei syndon da u Dr. Evarist Myrsing ban pynïakhun ha kane ka election 2023 na Mawhati Constituency ha Ri Bhoi District.
Kane ka la paw pyrthei ka dei hadien ba ka BJP ha ka sngi Saitjain ha ka jingïalang kaba la long ha Tyrso ka la pynthikna ba u Dr. Evarist Myrsing un ïa khun kum u kyrtong ka BJP na Mawhati ban aireng ha kane ka election 2023 bad na ka liang u Dr. Evarist Myrsing ryngkat kiwei ki nongïalam bad ki nongkyrshan ki la rung syndon sha ka BJP party bad pynthikna ruh ban trei bor bah na ka bynta ka jingjop jong ka party BJP na Mawhati Constituency.
Haba pynïasoh sha ka BJP party bad ba un long u kyrtong ka BJP ha kane ka election 2023 na Mawhati, ïa u Dr. Evarist Myrsing bad ki nongkyrshan jong u, la pdiang burom da u State president ka BJP, u Bah Earnest Mawrie ha rygnkat ka jingdon lang u myntri sorkar bad uba dei u MLA ka BJP, u Bah Sanbor Shullai, u Bah David Kharsati, Vice President ka state BJP lem bad kiwei kiwei ki nongïalam ka party na ka jylla bad na Ri Bhoi District.
Kum ban pynpaw, u Dr. Evarist Myrsing, u dei uwei u khun samla ka dong Ri Bhoi bad uba long trai na Mawhati Constituency bad ka long ruh ka burom ïa ka Constituency lada ki paidbah ki ai ïa ka jingjop ha kaba u la dei u samla uba la biang pura ha ka kyrdan pule puthi bad u la dei ruh uwei na u Senior Educationist mentor na ka Bharat Foundation bad ha kane ka kynti u la rai ban ïa khun na Mawhati na ka bynta ka jingkylla ka Mawhati.
Haba kren ha katei ka jingïalang ba la pdiang burom ïa u sha ka party, u Dr. Evarist Myrsing u la ong, “Nga sngewsahnut bad pang mynsiem ban iohi ba ki paidbah ka Mawhati constituency ki shah iehnoh khunswet bad sngewpangnud ruh ban iohi ba ka Mawhati ka dang dei kawei na ka Constituency kaba dang sahdien tam hapoh ka jylla” ong u Dr. Evarist, bad bynrap ruh kum u samla na katei ka dong bad ka thain u la shim ïa ka rai ban ïa khun ha kane ka election na BJP party ka dei halor ka nongrim ba wan rah ka jingkylla.
U la ong ruh kiba bun ki pyrshang ban pynsngenw thuh bakla ïa ka BJP party ba ka dei ka party ba pynshtom ïa ki Khristan, hynrei kine baroh ki dei ki tang ki jingpynjah burom ïa ka party bad ha ka ri India hi la synshar da ka BJP bad ka BJP kam dei ka party kaba pynshitom ïa ki Khristan.
Kum u samla ka dong bad ka thain um kwah ban kular ïa ka bneng bad khyndew kumba la kular ki nongmihkhmat ba la leit noh bad katba ynda haba la jop pat kim leh ei ei, ong u Dr. Evarist Myrsing, bad bynrap ruh ba u la mih ruh ban ïa khun na ka BJP party ka dei ryngkat ka jingdonkam ban kyrshan ki paidbah bad lada ki paidbah hi ki kloi ban pynjop u kloi ban trei na ka bynta ki paidbah bad ban wan rah ka jingkylla khamtam ha ka jingshah iehnoh bein ki paidbah ha ka liang ka surok.
U la ong ruh ba ki don shibun ki mat treikam kiba u kwah ban pynurlong na ka bynta ka Mawhati Constituency kum u samla uba la biang ha ka kyrdan pule puthi, hynrei ban pynurlong ïa kitei ki jingangnud jong u, donkam ka jingkyrhan ki paidbah ban pynjop ïa u ha kane ka election 2023 na katei ka Constituency.
Namarkata, u la bynrap ruh da kaba ong, ha ka kam sain hima sima dei ki paidbah kiba ai bor bad lada ki kloi ban pynkup bor ban long kum u nongmihkhmat jongki, u kloi ruh ban trei hok na ka bynta ki paidbah ban wan rah shibun ki jingkylla ba katei ka Constituency ka dang sahdien bad dang shah iehnoh bein, u la bynrap.
