Sdang shuwa ki kyrtong Congress ka jingthep kyrteng ha Ri Bhoi naka bynta ka elekshon 2023

0

Nongpoh, Rymphang 02: Ki 4 ngut ki kyrtong jong ka Congress ba kynthup naduh u Dr Celestine Lyngdoh kyrtong na Umsning Constituency, Bah Charles Marngar na Mawhati, Bah Stanlywis Rymbai na Umroi bad ka kong Rona Khymdeit na Nongpoh mynta ka sngi kila pyndep iaka jingthep kyrteng jong ki hakhmat ki Returning Officer ha ophis u Deputy Commissioner ka Ri Bhoi District naka bynta ban aireng haka elekshon 2023 sha ka iing Dorbar Thawaiñ, ryngkat ka jingsynran lang jong ki bahïing hasem.
Haba kren sha ki lad pathai khubor naka liang u Bah Charles Marngar President ka Ri-bhoi District Congress Committee, ryngkat bad u Dr. Celestine Lyngdoh kila pynpaw ka jingsngewkmen kaba khraw ba kum ka ki kyrtong ka seng Congress kila pyndep ka jingthep kyrteng mynta ka sngi naki 4 tylli ki Constituency ka Ri-Bhoi bad naka liang u kyrtong ka Jirang Constituency u Bah Adrian L Chyne Mylliem un sa pyndep lashai ka sngi.
Ki la pynpaw ruh watla bun naki paidbah ki kren beiñ ïaka seng Congress ha kaba kala don ruh ka jingïarung ïa mih ha kine ki sngi bala leit noh, hynrei naka liang kitei ki nongïalam ki ai khublei ïaki paidbah bad ki nongtrei jong ka party kiba la trei shitom ban ïai neh ha baroh ki 5 tylli ki Constituency ha Ri-Bhoi bad ki don ruh ka jingkyrmen kaba skhem ba baroh 5 ngut ki kyrtong kin ioh rah ïaka nam jop na Ri-Bhoi District.
Kila pynpaw ruh ba ka seng Congress kumba long haduh mynta kam pat khyllem lane ngam ha ka jylla kumba la pyntieng kohtympan da kiwei ki party hynrei kala pynïeng ruh ïaki kyrtong na baroh 60 tylli ki Constituency jong ka jylla Meghalaya ryngkat ki durkhmat kiba thymmai ki ban aireng ha kane ka elekshon 2023.

Leave A Reply

Your email address will not be published.