Khliehriat Rymphang 2: U kyrtong jong ka party National People’s Party, u ban ïakhun na ka 6-Khliehriat Constituency, u bah Nehlang Lyngdoh, mynta ka sngi ba ar u la wan ban thep kyrteng (nomination) ha u Returning Officer, ha ophis u Deputy Commissioner ka East Jaiñtia Hills District, ha Khliehriat bad la buh ruh ïa ka tarik ban leh ïa ka scrutiny ha ka 8 tarik mynta u bnai.
Ha kane ka sngi la ïasynran lang ïa u tei u candidate da ki MDC ba rim, ba kynthup ka kong Violet Lyngdoh bad u Joinriwell Pyrtuh, u Chairman jong ka JHADC, u Dr Sanky Shangpung, kumjuh ruh u election Agent jong ka NPP 6-Khliehriat Constituency, u bah ïasyllokki Lyngdoh, u bah Langmon Bareh, ki riew rangbah, ki dkhot bad ki nongkitkam jong ka party NPP East Jaiñtia Hills District.
Khyndiat shaphang u bah Nehlang Lyngdoh, u dei u briew uba la ju ïa don bynta teng mynshwa ha ka kam saiñ hima sima, uba la ju long ruh kum u nongmihkhmat ka thaiñ ha ki snem kiba kham mynshwa bad um pat ju shah rem ha man la ka jingïakhun, u la ïakhun nyngkong eh ïa ka election Meghalaya Assembly Election dei ha u snem 2003 na ka A-Rymbai Constituency ha kaba u la jop donburom, kumjuh ruh u la ïakhun biang ha u snem 2008 ha kane ka por ruh u la jop biang, hadien kane u la shongthai shi por, ha kaba u khlem ïakhun shuh ïa ka election ha u snem 2013 bad 2018, na ka daw ka jingbym bit bym biang bha ka koit ka khiah, kumta hadien kitei ki snem u bah Nehlang u la mih pyrthei biang mynta ka kynti ban ïakhun biang ïa kane ka election jong ka Meghalaya Legeslative Assemby 2023.
