Bteng ki Pulit ka Ri-Bhoi ban ïakhun pyrshah ïa u drok halor ka thong Nasha Mukh Bharat Abhiyan

Nongpoh, Naitung 01: Kum ka jingangnud ban rat diengkhong bad ïakhun pyrshah ïa ka jingjyllei jong u drok, khamtam ka thong bala wanrah da ka sorkar kmie lyngba ka Nasha Mukth Bharat Abhiyan, ki pulit ka Ri-Bhoi ki la bteng ban rung sha ki shnong kyndong bad khamtam sha ki skul ban pynsngewthuh paidbah halor ka jingma u drok bad kiei ki jingktah ïa ka jingim bad ka imlang ka sahlang.

Ka Nasha Mukt Bharat Abhiyan, ka dei ka skhim kyrpang ba la wanrah da ka sorkar kmie lyngba ka Ministry of Social Justice & Empowerment bad ka thong ka long ban pynduhjaid bad ban ïa khun pyrshah na ka jingktah u drok ha ki jylla bad ka ri hi baroh kawei.

Lyngba katei ka prokram, na ka liang ki pulit hapoh ka jingïalam jong ki ophisar ba dei peit ïa ki thanad bapher bapher ki la rung sha ki shnong bad ki skul, ban ai jinghikai bad pynsngewthuh ïa ki paidbah nongshong shnong, ki khynnah skul halor ka jingma jong u drok bad kumno ki kmie ki kpa ki dei ban phikir ïala ki jong ki khun, namar u drok u la rung sha bun ki bynta jong ki shnong ki thaw bad kan long kaba eh ïa ki samla kiba ngat ha u ban bthat, kaba wanrah pat shibun ki jingeh bad ki jingjynjar naduh ka jingim jong uto u khynnah ba ngat ha u drok, ka iing ka sem bad ka imlang ka sahlang baroh kawei.

Na ka liang ki pulit ki la kyntu ruh ïa ki khynnah samla ba kim dei ban mad bad ban kiar lai lum lai wah na ki paralok kiba pynshoi ban dih drok khnang ba ka imlang ka sahlang kan lait na u drok.

Shuh shuh ki la pan ruh ka jingkyrshan naduh ki nongïalam shnong, ki seng samla bad ki longkmie ban ai ka jingtreilang ban ïakhun pyrshah ïa utei u jait jingdih bad ban pyntip sha ki pulit haba don kano kano ka jingsuba ba don ki nongkhaii drok, khnang ba katei ka thong ban rat diengkhong ïa utei u jait jingdih buaid kan seisoh.