Mawkyrwat, ‘Naitung 01: U Bah Hamletson Dohling uba dei u nongaibuit jong ka Sorkar Meghalaya ha ka sngi baar u la plie paidbah ïa u Mawnongrim jong ka surok hapoh ka shnong Rangthong kaba dei ka surok ba la shna lyngba ka Chief Minister Special Development Fund (CMSDF) jong u snem 2024 – 2025 ha ka jingmang pisa kaba T. 26 lak tyngka bad shuh shuh kane ka shnong kan sa ïoh ruh ïa ka surok shnong (Internal Road) ka ban kot ha ka mang tyngka kaba T. 3 klur tyngka eiei.
U Bah Hamletson Dohling kum u kongsan haba ai jingkren ha ka jingïalang u la ai ka jingïaroh na ka bynta ka jinglah jong u Bah Kitborlang Nongrem uba don shisha ka jingkitkhlieh ïa ka shnong ka thaw kum u Myntri Shnong ha kaba katne u la lah ban pynurlong bad wanrah ki kam pynroi kiba long ki jingdonkam jong u paidbah hapoh ka shnong Rangthong bad ym tang kata ka dei ruh lyngba ka jingsbun jong u Myntri Rangbah ka jylla Meghalaya, u Conrad K. Sangma ha kaba u la kloi ban kohnguh ïa kaei ba ka shnong Rangthong ka donkam ïa ki kam pynroi hapoh ka shnong baroh kawei.
Ym tang katta, ha kane ka sngi ka la don ruh ka jingkyrpad na ka liang ki samla jong ka Rangthong Cultural Club Sports and Association jong ka shnong ban ïarap ban pynbha ïa ki madan phutbol kumjuh ruh na ka liang ka Tbeh jingshai Village Organisation ba ka donkam shuh shuh ban pynheh ïa ki kamra na ka bynta pynsah ïa ki longkmie ba armet na ka liang u Bah Hamletson Dohling u buh ka jingkyrpad ïa kiba un sa pynsngew ïa ki jingdawa ha u Myntri Rangbah ka Jylla, u Conrad K.Sangma bad kumjuh ruh ha u Bah Prestone Tynsong uba dei u Symbud Myntri Rangbah ka jylla ban pynsngap lem ïa kine ki jingdonkam hapoh ka shnong Rangthong.
Kiba la ïadonlang ha kane ka sngi ki long naduh u Myntri Shnong Rangthong, u Bah Kitborlang Nongrem uba bat ruh kum u Vice Chairman Construction Corporation jong ka Sorkar Meghalaya, u Bah Khlaiñborlang Malngiang, Assistant Engineer jong ka Mawkyrwat C & RD Block bad kiwei ryngkat ka jingsakhi lang da ki riew rangbah, ki nongkitkam bapher bapher hapoh jong ka shnong Rangthong, South West Khasi Hills District.
