Nongpoh, Naitung 02: Ka long shisha ka jingkyrkhu na ka bynta ki khun samla ka thaiñ Ri Bhoi Sepngi, ha kaba mynta ka sngi , u Myntri ka tnad pule puthi, u Rakkam A. Sangma kum u kongsan u la leit ban plie paidbah ïa ka Arts Stream ha Jirang Government Higher Secondary School, kaba dei kawei na ka skul pule kaba ai jingnang jingstad ïa ki khun samla hapoh ka dong Ri Bhoi Sepngi.
Ha kane ka jingleit hiar sha Ri Bhoi Sepngi, ba hap ha ka Jirang Constituency, u Myntri ka tnad Pule puthi, u Rakkam A. Sangma u la leit ruh ban jurip ïa ka Degree Model College ha Patharkhmah bad ruh ïa ka Eklavya Model Residential School ha Jirang, kiba dei ki shlem pule ban kyntiew ïa ka pule ka puthi bad ka jingnang jingstad ki khun samla katei ka thaiñ bad ha ka jylla hi baroh kawei.
La sakhi lang ruh ha kane ka sngi da ka jingdon lang u MLA ka Jirang u Bah Sosthenes Sohtun, u Director ka tnad pule puthi, u Bah B.J Kharshandi, ki ophisar sorkar, ki nongïalam shnong, ki khynnah skul, ki nonghikai bad ki paidbah nongshong shnong katei ka thaiñ Jirang.
Haba kren ha kane ka sngi kum u kongsan, u Mytnri ka tnad pule puthi, u Rakkam A. Sangma u la pynpaw ïa ka jingkmen ban ïa don ryngkat ha kane ka sngi na ka bynta ban leit jurip ïa ka Model Degree College ha Patharkhmah bad ruh ïa ka Eklavya Model Residential School ha Jirang bad khamtam ba la ioh ban plie ïa ka Arts Stream ha Jirang Government Higher Secondary School, kaba long kawei na ka thong jong ka sorkar ban kyntiew ïa ka pule ka puthi hapoh ka jylla.
U la ong ruh ka sorkar jylla hapoh ka jingïalam u Myntri rangbah ka jylla, u Conrad K. Sangma ym dei tang ba ka don ïa kata ka thong ban wan rah ïa ka roi ka par bad ki jingkylla hapoh ka jylla bad kane ka sorkar ka don ïa ka thong ba kyrpang ban kyntiew ïa ka pule ka puthi.
“Tang hapoh ki 5 snem ba kane ka sorkar ka la synshar hapoh ka jylla, ki la don haduh 21 tylli ki People College hapo ka jylla bad shen ka sorkar kan wan rah ruh ïa ka Model Degree College ha East Jaintia Hills bad ha West Khasi Hills” u la ong bad bynrap ruh kane ka jingangnud ka sorkar ka long hi ban kyntiew ïa ka pule ka puthi ki khun samla hapoh ka jylla” u la bynrap.
U la ong ruh kumba mynta ka sngi, da ka jingshim khia u MLA bad ki ophisar la lah ban plie ïa ka Arts Stream ha Jirang Government Higher Secondary School bad nangne shakhmat yn dang ïa trei shitom ruh ban wan rah sa ïa ka Commerce Stream khang ban suk ki khun samla ban dang pule sha ki kyrdan kiba shaneng lada don kita ki shlem pule ha man la ki dong bad ki thaiñ jong ka jylla.
Shuh shuh, u la bynrap ruh kane ka jingurlong kane ka jingplie ïa ka Arts Stream ha Jirang Government Higher Secondary School, ka dei hi ruh ka jingïatrei ryngkat naduh u MLA, ki ophisar bad ka sorkar bad khmih lynti ruh ba ngin dang lah shuh shuh ban pynjanai ïa kikam na ka bynta ban kyntiew shaphrang ïa ka pule ka puthi hapoh ka jylla, u la bynrap.
