Jowai, Naitung 02 : U Waheh Shnong ka Lapangap u ma Deimonmi Lyngdoh ula pynrem jur halor ka jingkynnoh bad ka jingkam jong uwei u briew na ka shnong, ba u shah siat da ki jri siat sim haki briew Karbi naka shnong Lakaroi hynnin ka sngi, hynrei hadien bala ïoh jingtip na ki pulit la pyntikna ba kane kam dei kaba shisha ong Waheh Shnong.
Da kaba u ong katei ka jingmynsaw jur jong u ka dei na ka daw ka jinghap jong u na ka Bicycle ba u ñiah bad uba la mynsaw ha ki bynta jong ka dur khmat.
Shuh shuh u Waheh Shnong ka Lapangap ula pynrem jur ïa kane ka jingkam jong utei u nongshong shnong kaba lah ruh ban wanrah ïa ka jingïakhajia hapdeng ki ar jait bynriew (Karbi bad ki Khasi-Pnar). Naka liang ka shnong ruh kala phah ha ki Volunteer ban tohkit bniah ïa kane jingkam bad ka shnong kam don jingkitkhlieh shuh halor kane ka jingkam jong u.
Ha ka juh ka por u ma Lyngdoh ula maham tyngeh nangne shakhat ïa kino kino ki briew jong ka shnong kiba kam ïa jingbym shisha namar ka lah ban ktah ïa kiba bun ba lang bad khamtam eh ïa ka shnong hi baroh kawei.
Hadien ka jingmynsaw jong utei u briew la ïalam ïa u sha Namdong CHC ban ïoh ka jingsumar da ka jingdonlang u Waheh Shnong hi, da ka jingthmu ban ai jingïarap ïa u halor kane ka jingshah siat jri kumba ula kynnoh.
Na ka bynta ka jingshong suk shong shngaiñ jong ki briew ka shnong kiba dei ki nongrep u Waheh Shnong ma Deimonmi Lyngdoh ula kyntu jur ïa ka sorkar jylla ba kan ai jingïada ba pura ïa ki nongrep da kaba buh ïa ki pulit SF-10 kumba leh ka Assam.
Ula ong ruh haduh mynta ki nongrep kim nud shuh ban leit rep sha ki lyngkha jong ki na ka daw ba ki tieng ïa ki briew jong ka Karbi kiba ju pyntieng pynsmiej manla ka por bad kam long ruh kaba shngaiñ ïa ki ban leit sha kitei ki jaka ba dang don hapdeng ka jingïa kajia.
