Nongstoiñ, Naitung 2: Namar ka jingpynsahteng jong ka sorkar ban plie noh ïa ka Maternal & Children Hospital ha Nongstoiñ bad ban pyntreikam pura ïa bun tylli ki Sub Health Centre kiba la dep shna ha ki shnong bapher bapher hapoh West Khasi Hills, ki nongïalam ka FKJGP West Khasi Hills District ha kane ka sngi balang ka 2 tarik Naitung, ki la leit ban ïakynduh ïa ka District Medical & Health Officer bad aiti ruh da ka jingthoh ha kaba ki la kdew ïa bun tylli ki mat kiba don kam na ka bynta ban pynbit pynbiang ïa ki lad ai jingsumar na ka bynta ki paitbah.
U bah Pynshai Kharbani President ka FKJGP West Khasi Hills haba ïakren bad ki nongthoh khubor hadien ba ki la mih na ka kamra treikam jong katei ka Ophisar, u la ong ban ka sorkar ka la dep ban shna bun tylli ki Sub Health Centre ha West Khasi Hills, hynrei haduh mynta ym pat shym la plie satia.
U la ong ruh ba kumba ka long mynta ki kali kit nongpang ha Nongstoiñ Civil Hospital kim pat biang satia bad la I donkam ruh ba ha katei ka Hospital la donkam ban don kawei ka kali kit metïap. U la ong ban ha katei ka Hospital ym pat don u Doktor Specialist u ba dei ban leh ïa ka Ultra sound, Radiologist, la donkam ruh ban don Pathologist bad Radiologist kiba dei ban leh pynbit pynbiang ha kaba test ïa ki nongpang.
Nangta donkam ruh ban don ïa u doctor khmat bad bun kiwei kiwei ki doctor kiba dei ban peit ha la ki jong ki jong ki bynta katkum ki jait jingshitom ba ki nongshong shnong ki don.
Ki nongïalam ka seng ki la kdew ruh ha katei ka jingthoh ïa kiba bun ki jingduna ha ki PHC kum ha Maweit, Riangdo, Nonglang, Rambrai bad kiwei kiwei namar ba kat kum ka jinglap jong ka seng ki dang don shibun ki kam kiba ka sorkar kam pat thung satia ïa ki nongtrei.
Nalor kata ka jingbym don kali kit nongpang ha kitei ka jaka sumar, ka dei kawei ka mat ba ka seng ka la kyntu jur ba ka sorkar ka dei ban pynbiang, namar haba ki nongshong shnong ki shitom bad ki hap ban pynkit sha kiwei pat ki jaka sumar ba kham bha, ki hap ban shim wai da ki kali shimet.
Kumta ka ktah haduh katta katta ïa ka jinglut jingsep khamatam la dei ki longïing longsem kiba duk ki hap ban shim da ka ram ka shah na ka bynta ka bai kali.
Utei u nongïalam ka seng u la kyntu ïa ka sorkar lyngba ka DM&HO, ba kan shimkhia na ka bynta ban pynbit pynbiang ïa ki jaka sumar hapoh ka District, kynthup ruh ka jingsdang ban plie bad pyntreikam noh ka MCH Hospital, khnang ba ki paitbah kin ïoh ïa ka jingsumar ba paka.
