Jowai, Naitung 02: Ka Bosco Pnar Multipurpose Vocational Training Centre, Sailini Colony, Mihmyntdu, Jowai kala ïoh ban sam ïa ki syrnot sha ki samla kiba la pyndep ïaka jingshah hikai haka kam shna light na ka bynta 4th Batch jong ka Electrical Appliance Repairing.Ïa kane ka jinghikai la pynlong hapoh ka jingpeit jong ka RAMP (Raising and Accelerating MSME Performance) jong ka District Industries and Commerce Centre na ka bynta ki ar tylli ki District jong ka West bad East Jaiñtia Hills.
U Fr. Abialstar Kharsohtun, Manager ka Bosco Pnar ula ai ka jingïaroh halro ka jingshimkhia jong ki nongshah hikai baroh bad ula kyntu ba kin pyndonkam hok ïa sap kaba kila ïoh na kane ka prokram.U bah B. Warjri General Manager ka DCIC, Jowai ula ai mynsiem ïa ki nongshah hikai ba kin pyndonkam hok ïa ki jingtip kaba kila ïoh, khnang ban pyndonkam ha ka jingim lyngba ki kam ki jam. U la bynrap ruh ba ka ophis jong ka DCIC ka plie ban ai jingïarap ïa kitei ki samla da kaba leit mih sha ka ophis treikam ha kano kano ka por ba donkam.
Kiwei de kiba la ai jingkren ki kynthup ïa u ma S. Pala, Functional Manager, DCIC Khliehriat, bad ma U Eborki Pyrbot, Functional Manager, DCIC, Jowai.
