Nongpoh, Naitung 02: Na ka daw ba dang don ki kynrum ki kynram hapoh ka Elaka Nongpoh Sirdarship, ka Khasi Hills Autonomous District Council ka la thung noh da u Administrator ban peit ïa ka synshar ka khaddar bad mynta ka sngi u Deputy Secretary ka KHADC u Bah A. Basawïawmoit u la leit ban shimti kum u Administrator ban peit ba khmih ïa kane ka Elaka Nongpoh Sirdarship kaba don ha Ri Bhoi District.
Kane ka jingshim rai ka KHADC ban thung da u Administrator ban peit ïa ka synshar ka khaddar hapoh ka Elaka Nongpoh Sirdarship, ka mih ruh hadien ba ki don ki khlieh nongsynshar na ka Raid bad ka Elaka ki la ujor sha ka ingbishar ka High Court ban pyrshah ïa u Bah Wanphrang Syiemnongshai kum u Sirdar ka Elaka Nongpoh Sirdarship bad ka ingbishar ka High Court ka la pynmih da ka hukum hapoh 3 bnai ban pyntreikam da ka Referendum, na ka bynta ban bishar bad tohkit bniah ban pynbeit ïa kine ki kynrum ki kynram hapoh ka Elaka Nongpoh Sirdarship.
Mynta ka sngi, u Bah A. Basaïawmoit ba la thung kum u Administrator, la wan ban ïa kynduh ïa ki nongïalam ka Hima bad ka Raid bad ha kajuh ruh ban shimti ïa kane ka kam ba la bynsht ban long kum u Administrator hapoh ka Elaka Nongpoh Sirdarship.
Haba kren sha ki lad pathai khubor, u Bah A. Basaïawmoit u la ong ba u la shimti ïa kane ka kam kum u Administrator ka Hima 12 Lyngdoh, ka dei namar ba ïa u Sirdar kane ka Hima la sospon noh ha u snem 2024, kaba dei hadien ba ki klieh nongsynshar ka Hima bad ki Raid ki la ujor sha ka ïingbishar badon burom jong ka High Court.
U la ïathuh ruh katba ym pat lah ban thung da u Sirdar ba pura hapoh kane ka Hime ne Elaka, u hap ban shim kum u khliehduh ban peit ïa ka synshar ka khaddar na ka bynta ka jingbit jingbiang ki paidbah hapoh kane ka Hima.
Shuh shuh, ha kane ka sngi hadien ba la shimti kum u Administrator ka Hima 12 Lyngdoh, la thung ruh ruh shipor ïa u Bah Lui Star Lyngdoh kum u Secretary bad 10 ngut ki khlieh nongsynshar kum ki dkhot ban ïa peit lang shipor ïa kane ka Hima katba ym pat lah ban thung da u Sirdar ba pura.
