Shillong, Naitung 02 : Ki nongïalam jong ka Khasi Student’s Union (KSU) ki la pynpaw ba haduh mynta ka Seng kam pat randien na ka jingdawa pyntreikam ïa ka Inner Line Permit (ILP) ha ka jylla hynrei kan ïai bteng ban dawa bad pynkynmaw na ka por sha ka por.
Haba kren bad ki lad pathai khubor, u General Secretary ka seng, u samla Donald V Thabah u la ong, “Katba ka jingdawa ïa ka ILP ka dang ïaid, haba ka sorkar ka tyrwa bad wanrah ïa ka Meghalaya Residents, Safety and Security Act (MRSSA) na ka liang ka seng ngi la pdiang ban pyntreikam ïa kane ka aiñ.”
Une u nongïalam ka KSU u ong ruh ba ki bor bahalor ha ka sorkar pdeng kim lah ban ai daw ba ka jylla ka dei ka transit state, lane ka jaka ba kiwei ki jylla ki hap ban ïaid lyngba. Katkum ka jingong jong u, ki don ki jylla ha ka thain shatei lam-mihngi kiba kiwei ki jylla ki hap ban ïaid lyngba hynrei ki ïoh pat ïa ka ILP.
“Ngi kwah ban ong tang katne, ba, katba ngim pat ïoh ïa ka ILP ngin ym pat shongthait bad ba ka jingdawa ïa ka ILP ruh kan ïaid beit,” ula bynrap biang.
Une u nongïalam ka KSU u la ong ruh ba ki jingïakhih ban dawa ïa kano kano, bunsien kim ju urlong hangto hangto. Kumta u la ong ba donkam ka jingïai bteng ban buddien ne ïakhih na ka por sha ka por ba kan long ka jingpynkynmaw ïa ka sorkar jylla bad khamtam ïa ka sorkar pdeng haba ïadei bad kane ka mat.
Katkum ka jingïathuh jong u Bah Donald, kane ka mat ïakhih dawa ILP kadei kaba la slem bha kaba la sdang naduh ka por jong u Bah Bull Lyngdoh bad ka dang ïai bteng haduh mynta mynne.
