Kular u DC ban thoh sha ka sorkar ban buh pulit kumba leh ka Assam

Jowai, Naitung 02: Ka Jaiñtia Students’ Union (JSU) seng kmie mynta ka sngi Balang kala leit tur sha ka phyllaw jong ka ophis u Deputy Commissioner ka West Jaiñtia Hills District bad dawa jur na ka sorkar ban buh noh da ka kynhun pulit SF-10 ha ka shnong Lapangap kaba dei ka jaka ba ïakhajia pud hadpeng ki jaitbynriew Karbi bad ki Khasi-Pnar.
Kane ka jingleit mih ka JSU ka long halor ka nongrim ban dawa ïa ka hok jong ki nongshomg shnong ka Lapangap bad kiba shong basah ha ki jaka khappud, ka seng kala pynsngew dang ha une u bnai bala dep haka 26 tarik u Jylliew kila dep ban leit ïakynduh ïa u symbud myntri rangbha ka sorkar jylla u bah Prestone Tynsong bad kumjuh ïa ka Director General of Police (DGP) ka kong Idashisha Nongrang, IPS ban buh noh daka kynhun SF-10 ha katei ka jaka ban ai ka jingïada ïa ki nongshong shnong ka thaiñ.
Ha kane ka jingleit mih sha ophis DC mynta ka sngi ki dkhot ka seng kila ïoh lad ban ïakren bad u Deputy Commissioner ka WJHD u Abhinav Kumar Singh, IAS ha kaba ula pyntikna ruh haka ADC ba ki don shisha ki kynhun SF-10 jong ka sorkar Assam ha katei ka jaka ba khajia pud. Kumta na ka liang u DC ruh ula kular ban phah da ka jingthoh sha sorkar jylla (Meghalaya) ba kan bun kumjuh da ki kynhun SF-10 ha Lapangap.
Ha ka juh ka por u DC ula kular ban ai jingpahara ïa manla ki nongrep bad ki nongshnong shnong ba kin leit trei pyndep ïa ka rep ka riang jong ki sha ki pynthor kba khnang ban lait na kano kano ka jingjia ba sngewsih. Ula khot lang ïa baroh kum ki nongshong shnong ban ïadonlang ha ka Peace Committee na ka bynta ban wanrah ïa ka jingïasuk hapdeng kine ki ar jait bynriew.
Naka liang ka seng ka pynpaw ka jingsngewkmen ïa kine ki jingkular jong u DC, ha kaba ki la shim ïa ka rai ban weng noh ïa ka jingïakhih mynta ka sngi da kaba rah lama bad ki jingthoh ban pynrem ïaka sorkar.