Shillong, Rymphang 02 : U National Vice President ka NPP bad Symbud Myntri Rangbah ka jylla Bah Prestone Tyngsong ula ïathuh ba ki bor pynïaid bad nongïalam jong ka NPP kila kyndit halor ka jingphet seng syndet bad shet kylla jong u Lamphang barim ka jylla u MM Danggo ïa ka party ha ka minit ba khatduh bad leit pynïasoh noh ïalade bad ka seng BJP.
“Ngi la kyndit ba ula leit ban rung noh sha ka seng BJP, hynrei ngim lah ban leh eiei ne ban ong eiei. Kan shong ha u ban shim ïa ka rai” ong u Bah Prestone Tynsong.
Ula ong, shen ka NPP kan sa shim ïa ka rai la kan pynïeng ne kan ym pynïeng kyrtong shuh napoh ka Ranikor Constituency haka Elekshon MLA.
Lah ban kdew ba u MM Danngo udei u kyrtong ka seng NPP hynrei ula mih noh na kane ka seng bad ula pynïasoh noh bad ka BJP ha ka sngi Balang.
“U Myntri Rangbah, ma nga bad u bah Sniawbhalang ngin sa ïa shong pyrkhat mynta ka miet bad ngin sa shim ïa ka rai kaba biang” ong u Bah Prestone.
Katkum ki khubor kiba la saphriang, ki nongkyrshan ka NPP ha Ranikor ki kwah ba ka seng kadei ban pynïakhun ïa u Bah Kitboklang Nongrem ne ïa u Nelbi Sangma haka elekshon MLA na Ranikor hadien ba u Danggo ula phet noh naka seng.
Halor ka jingkylli ba ka BJP ka sdang ban khroh ïa ki kyrtong ka NPP, une u nongïalam ka NPP ula ong, kane ka dei ka kam politik ïa kaba ym lah ban ong eiei.
“Ha ka khyllipmat jong ka jingshim rai ban pynïasoh bad kano kano ka seng ka long kaba donkam ban wad bniah bha nalade bad yn sa lah ban leit pynïasoh bad kawei patka seng” ong u Bah Prestone.
Lah ban ong, u MM Danngo ula shet kylla arsien ïaka seng NPP, kata ka long hadien ba ula rem ïaka elekshon shiteng samoi na Ranikor ha u 2018 ula mih noh naka NPP bad mynta sa tang shi bnai ban sdang ka elekshon ula phet biang na kane ka seng.
“Ngam lah ban ong eiei na ka bynta ka jongu, hynrei kan bha shibun lada kylli hi na u, kaei kaba la pynlong ba yn leit pynïasoh sha ka seng BJP ha ka minit kaba khatduh tangba ka don kaei re kaei sha lyndet halor kane ka jingphet jong u na ka NPP” la pynkut u Bah Prestone.
