Nga rung sha ka NPP namar ki nongïalam ki sngap bad burom watla nga dei na kawei ka party: Teibor

Shillong, Rymphang 01: U MDC ka Mawlai uba dei u kyrtong ka National People’s Party (NPP), u Bah Teiborlang Pathaw u la ong ba ka jingïakhun jong u ïa ka election MLA na ka seng NPP, kadei namar ba ki nongïalam ka NPP ha ka Sorkar Meghalaya Democratic Alliance (MDA), ki sngap bad burom ïa u kum u nongmihkhmat khlem da kheiñ ba udei na kawei ka party.
U Bah Teibor u la jop ïa ka election MDC ha u snem 2019 kum u kyrtong shimet, hadien kata u la rung sha ka seng UDP kum u MDC, hynrei u la leit ban pynïasoh noh sha ka NPP ban ïakhun ïa ka election MLA ka ban long ha ka 27 tarik mynta u Rymphang.
“Haba nga phai sha ka Sorkar ba ïalam da ka NPP, ki nongïalam jong kane ka party kat shaba nga leit ban kyrpad na ka bynta ki jingdonkam jong ka shnong Mawlai, ki burom watla ha kito ki por ngam pat dei na ka party jong ki, hynrei ki burom ïa nga ba nga dei u nongmihkhmat uba la jied da ki paidbah bad ki peit ïa ki jingeh ba u leit ban pynsngew,” u la ong bad bynrap ba kane ka jinglong ka la pynlong ïa u ban phaikhmat sha kane ka seng NPP da kaba pyrkhat ïa kaba bha tam na ka bynta ki nongshong shnong ka Mawlai.
U Bah Teibor u la ong shuh shuh ba hadien ba u la shah jied kum u MDC u la pyrkhat kaei kaba bha tam ba u dei ban leh na ka bynta ki paidbah ka Mawlai. “Hooid nga la leit ban pynïasoh shipor bad ka UDP, hynrei haba nga ïaid nga ïohi ba ka jingpyrkhat jong nga ban shakri ïa ka shnong Mawlai kam ïahap dur bad kiba don hapoh ka seng UDP,” u la ong.
Ha kaba ïadei bad ka jingshah kynthoh jong ka seng NPP kaba ïalam ïa ka Sorkar, une u kyrtong u la ong ba lada peit ïa ka rukom treikam jong ka NPP ka la leh bun kiei kiei kumba ka la kular ha u snem 2018. U la ong ba ki nongïalam jong kane ka party kiba la shim ïa ka jingkitkhlieh ban pynbha ïa ka Jylla, ki la wanrah shisha ki jingmyntoi.
“Ki paidbah kidei ban sngewthuh ba kane ka Sorkar san snem ka la leh, katba kiwei kiba la synshar
arphew snem kim lah. Nga ngeit skhem ba lada ki paidbah ki ai biang ka jingshaniah ha ka NPP, ki bun kiei kiei kiba kane ka seng kan sa leh ban wanrah ka jingbha ïa ka Jylla,” la ong u Bah Teibor.
U la ong ruh ba lada shu ïa kdew kti tang ia ka NPP te kam long kaba dei namar ha ka Sorkar MDA baroh seng saiñpyrthei ba ïakhun ïa ka election mynta ki don lut, bad shisien ba ki leh ïa kaba bha ne kaba sniew kine ki seng ki dei ban shim lang ïa ka jingkitkhlieh namar baroh ki kam ba ka Sorkar ka leh kam dei ba ka NPP ka rai hi marwei. “Lada phi ong ba ka NPP kam long, kaei pat kaba long,” la ong u MDC ka Mawlai.