Shillong, K’lyngkot, 02: U National Vice President ka National People’s Party (NPP) u Bah Prestone Tynsong ha ka sngi Palei u la pynpaw ka jingsngew skhem ba ka NPP kan ïoh ïa ka jingjop kaba bun paid ban thaw syndon ïa ka Sorkar hadien ka elekshon.
“Mynta ka kynti, ngin tam haduh 34 Seat bad khamtam na kata ruh,” ong u Bah Prestone ha ka jingïakren bad ki lad pathai khubor.
Haba pynpaw ba ka NPP ka la nang ïoh jingshahniah na ki nongthep vote ha ka jylla, u la ong, “ngam pat ju ïohi ha ka jingim jong nga ïa ka jingtuid jong ki paidbah da ki hajar. Balei? Namarba ki jingkynnoh pyrshah ïa ngi ki la long shaba palat pud bad kaba pynlong ïa ki paidbah, ki nongthep vote ka Meghalaya haba ki bishar da lade, (ki shem) ba ka Sorkar ba la ïalam da ka NPP ka la trei kham bha ban ïa kino kino ki sorkar kiba la ïalam da kiwei pat ki seng saiñpyrthei.
Haba kylli halor ka rai jong ka BJP ban ym weng na ka Sorkar MDA ba ïalam da ka NPP, u Prestone Tynsong uba long u Symbud Myntri Rangbah u la ong, namarba ki jingkynnoh pyrshah ïa ka party kim long kiba don nongrim bad ki nongthep vote ruh ki dei kiba stad kin sa ai jubab ïa ki ha ka 2 tarik, Lber.
“Nga kyndit (ban ïohi kumno ki rai ban shong) namarba khyndiat ngut na ki nongïalam ki la byrngem ban mih noh na ka Sorkar MDA ba la ïalam da ka NPP bad nangta ki la kdew kti bun ki jingkynnoh ha kaba wat ma nga ruh nga ladep kren da kaba shai lada phi sngew ba phi kwah ban mih balei phim shu mih beit hynrei kumba ka long mynta ka por ka la dier (ïa ki) ban mih,” u la ong.
U la buh jingkylli ruh balei ka BJP kam shym la kdew kti ha ki saw snem shiteng kiba la leit noh. “Hynrei balei tang lai bad saw bnai shwa ka elekshon phi kynnoh khlem nongrim. Na kata ka daw ngam sngew phylla ba ha kawei ka liang kin ong kane ka Sorkar ba la ïalam da ka NPP ka dei kaba sniew bad ha kawei pat ka liang kin ong ba ngi kyrshan ïa ka Sorkar ba la ïalam da ka NPP. Ai ki paidbah hi kin sa bishar.”
Une u nongïalam ka NPP u la takraiñ ruh ïa ki nongïalam ka seng Congres kiba la kynnoh ba ka Sorkar MDA ka la ïada ïa ki riewbamsap bad ong, “ki dei tang ki jingkynnoh kiba khlem nongrim. Ka dei tang namarba ki kwah ban ïoh vote bad ban pynkulmar jingmut ïa ki nongthep vote ka Meghalaya hynrei ngan ong ïa phi da kaba shai ba ha kane ka kynti ngin tam palat 34 Seat.”
Haba pynshai shuh shuh u la ong, “ha ka jingshisha, haba phi bat ïa u lakam synshar, ka synshar ka khadar kan neh haduh kaba kut bad ngi dang bat ïa u lakam synshar bad ngin don ki kyndon ban bishar ïa kawei pa kawei ka tnat treikam. Haba don ki jingkynnoh la ka long kaba thok ne kaba shisha, kumno ban lap ïa ki jingshisha ngi don ïa ki buit treikam bad ngi don ruh ïa u Chief Vigilance Officer uba dei u Chief Secretary ha kaba kino kino ki lah ban leit pynsngew sha u khnang ba un dup leh ïa kaba donkam.”
