Pynphai ka Kong Purity sha ïing u Bah Paul ïa ki bowl bad Pressure Cooker sha u Bah Mohendro

0

Shillong, Rymphang 02: Ka President jong ka STIEH ka Kong Purity Phawa kaba dei ka nongshong shnong ka Lumdiengjri kab hap hapoh ka West Shillong Constituency ha ka sngi Palei ka la leit ban pynphai noh sha ïing ki kyrtong ïa ki jingai sngewbha jong ki arngut ki kyrtong kiba pynkhreh ban aireng ha kane ka elekshon na West Shillong.
Kine ki tiar kiba ka Kong Purity ka la leit ban pynphai ki dei ki bowl kiba la pynpoi da ki nongïalam jong u kyrtong ka UDP u Bah Paul Lyngdoh bad kumjuh ïa u Pressure Cooker ba la pynpoi da ki nongïalam u kyrtong ka NPP u Bah Mohendro Rapsang.
Haba kren sha ki lad pathai khubor ka Kong Purity ka la ong ba kane ka jingleit pynphai noh jong ka ka dei namar ba kam kwah ba ka jingjied nongmih khmat kan dei ba kin long ki nogsamsam tiar sam tar ne distributor hynrei ki nongthawaiñ ne legislator.
“Kine ki jingai kine ki kyrtong ka long ka jingpynjem daw lada nga shim ban pyndonkam ïa ki hynrei nga kwah ban ong ba ka jingjied jong nga ïa ki nongmih khmat kan dei ha ka nongrim ba ki ïeng ym ha ka jinglah ban ai jingai sngewbha shuwa ka elekshon,” ka la ong.
Haba kylli mynno la pynpoi ïa kine ki tiar, “Dang mynta ka taïew hi ki pynpoi kawei mynsngi Saitjaiñ bad kawei pat mynsngi Nyngkong, jin lada nag don ha ïing naduh ka sngi kaba ki wan pynpoi nga la kyntait mardor” ka la ong.
Ka la ong ruh ba kumba ka kwah ba kan ïoh ïa ka synshar khadar kaba khuid ba suba ka dei ban sdang shuwa na lade da kaba kyntait ïa kino kino ki jingai kiba ki kyrtong ki ai shuwa ka elekshon.
“Nga kwah ba ki paidbah kin sngewthuh ba ka jingjied MLA ka dei ka kam ïap kam im ka jaidbynriew, namarkata, kim dei ban jied da kaba pynshong nongrim ha ki kot san spah ba ki ai ki kyrtong hynrei ban da pyrkhat ruh ïa kaei kaba la jia khlem da klet ïa ka jingshah siat u Bah Che bad kiba bun ki mat bad ban peit ruh sha khmat kaei kaban jia ïa ka jaidbynriew,” ka la ong.

Leave A Reply

Your email address will not be published.