Bajengdoba, Rymphang 02 : U National President ka National People’s Party (NPP) Conrad K Sangma hynne ka sngi palei, ula ther tyngeh ïa ka Trinamool Congress (TMC) khamtam ïa u Nongïalam jongka u Dr Mukul Sangma namar ka jingshet kylla, leh khun jakai ïa bad pynlong riewkai ïa ki paidbah ka Ri-lum Garo.
Ula ong ba ka rai jong u Dr Mukul ban ïakhun na Songsak bad Tikrikilla, kan sa ktah jur ïa u namar ki paidbah kila sngew kumba shah shet kylla bad ki kwah ban kylli ïa u halor ka jingbujli constituency kata na Ampati sha Songsak bad mynta sa sha Tikrikilla bad kano ka constituency kaba un ieh lada u jop na baroh artylli ki constituency.
“Ha ka jingïalap elekshon hynne ha Tikrikilla, nga la kylli ïa ki paidbah halor ka jingïeng u Dr Mukul nangne na Tikrikilla bad ruh na Songsak. Ki paidbah ki kwah kylli ïa u halor ka jingphet na Ampati sha Songsak bad mynta sha Tikrikilla. Hato un ieh noh ïa ka Songsak ne Tikrikilla lada u jop na baroh ar? Ki paidbah kila ïohi ïa kaei kaba u thmu” ong u Conrad ha ka jingïalap elekshon ha Bajengdoba, North Garo Hills.
Haba pdiang ïa u Silman K Sangma khun jong u Myntri Rangbah barim Salseng C Marak ha ryngkat ki spah ngut ki nongkyrshan, ula ong ba ka NPP kan sar ïa ka jingjop ha baroh kawei ka Ri-lum Garo namar ka dei ka party kaba skhem bad kaba khlaiñ bad kaba lah ban ai ïa ka jingsynshar kaba paka.
U Conrad ula ong ruh ba ki paidbah kila ïohi ïa ka buit jong u Mukul Sangma bad ka party na West Bengal, kaba pynlong ïa ki briew ban mih noh na ka TMC bad ïasoh sha ka NPP.
“Ka jingdon jong ki briew na kiwei ki party ban wan sha ka NPP ka dei ka dak ba shano ka result jong ka elekshon la 27 tarik Rymphang kan poi. Kylli hangno hangno ruh ha ka Jylla, Khasi-Jaintia lane Ri-lum Garo, ki paidbah kin ïathuh ïa phi ba dei ka NPP kaba ha khliehduh. Ka Congress kaba la rim duh kala duh bor noh namar ka jingïapait ïapra. Ki paidbah ka Jylla kila phaikhmat sha ka party kaba skhem bad kaba khlaiñ, kaba lah ban ai ka jingsynshar kaba bha bad baroh ki khmat kila phai sha ka NPP” ong u Conrad.
U Myntri Rangbah ka Jylla ula ong ruh ba ha ka por ba ka NPP kala thaw ïaka Sorkar ha u 2018, um shym la dei u Myntri Rangbah na ka bynta ka NPP hynrei kum u Myntri Rangbah jong baroh ki Nongshongshnong.
“Peit ia ka Chokpot, u MLA u dei na ka Congress, uba la phet sha ka TMC, bad ha kiba bun ki khep ki sorkar ba don ha ka bor ki ju phai lyndet ïa ki jaka ba mihkhmat da ki Liang Pyrshah hynrei ka Sorkar jong ngi kala leh da khongpong. Ngi la ai haduh T. 35 klur ban shna ïa ka surok na Baromile sha Chokpot namar ka surok ha katei ka thaiñ ka long kaba sniew bha” ula ong.
Ula kren ruh halor ka FOCUS bad FOCUS + scheme, ka skhim ka bha ka miat u paidbah ba hehduh ha Jylla, ha kaba haduh T. 450 klur la dep ban pyllait ban ïarap pisa ïa ki Longïing. Ula ong ba haduh 6.5 lak ngut ki nongshnong kila ïoh jingmyntoi na kane ka skhim, katba ka jingdon jong ki Self Help Group (SHG) ha Jylla kala kiew na ka 4000 tylli ha u 2018 sha ka 40,000 tylli haduh mynta.
“Ka WE card ka TMC ka dei tang ka jingkular elekshon, wat shah pynthame da kine ki jingkular thok” ong u Myntri Rangbah.
Haba pynpaw baka “Lyer jong ka jingkylla kala wan”, u Conrad ula ong ba ka NPP kan sar ia ka jingjop na North bad South Garo Hills kynthup ka Ampati bad Tikrikilla ha kane ka Elekshon.
