Ka Khasi-Jaiñtia State, ILP, Uranium napdeng ki mat kular elekshon ka HSPDP

Shillong, K’lyngkot, 02: Ka Hills State Peoples Democratic Party (HSPDP) ha ka sngi Palei ka la pynbna paidbah ïa ka Election Manifesto jong ka Party kum ka jingkular sha ki paidbah nongshong shnong jong ka jylla ban pynurlong ïa ki mat kiba la khlei na ka bynta ban ai ka jingshakri sha ki paidbah ka jylla Meghalaya hadien ka elekshon.
Ïa ka Elekshon Manifesto la pyllait paidbah da u President ka party u Bah KP Pangniang lem bad ki nongïalam jong ka Party ha ka jingïalang kaba la long ha nongbah Shillong.
Nadpeng ki 27 tylli ki mat, kiba ka HSPDP ka la kular ban pynurlong ha kane ka Elekshon Manifesto, la shem ba ka party ka la pynrung ïa ka jingdawa Khasi-Jaintia State, ka jingbuddien ïa ka jingdawa Inner Line Permit, ka jingdawa ban ithuh noh ïa ka Ktien Khasi hapoh ka Khyrnit Baphra jong ka riti synshar ka Ri India, ban pyrshah ïa ka jingtih Uranium bad kiwei kiwei de ki mat.
Ha kane ka sngi, ka party ka la pynbna paidbah ruh ïa ka thup kyrteng kaba ar jong ki kyrtong kiba kynthup ïa u Bah Martle N. Mukhim na Mawkynrew Constituency, u Bah Wyraiwan Sohtun na Mawryngkneng Constituency, u Bah Sandondor Ryntathiang na Sohiong Constituency bad u Bah Starfing Love Langpen Pdahkasiej na Mawsynram Constituency.