Ha ktem PDF hiar u Bah Prestone ban ïalap elekshon na bynta u kyrtong NPP na Sohra

Don ki nong Sohra bym kwah distrik: Bah Alan

0

Shillong, Rymphang 02 : U National Vice President ka National Peoples Party, Bah Prestone Tynsong ba dei ruh u Symbud Myntri Rangbah ka Jylla ha ka Palei u la hiar sha Laitlyngkot kaba dei ka ktem jong u President ka PDF bad MLA ka Sohra, Bah Gavin Mylliem, na ka bynta ban ïalap elekshon na bynta u kyrtong ka party na Sohra, Bah Allan West Kharkongor.
Ha katei ka jingïalang kaba dei tang na bynta ka thaiñ Laitlyngkot bad Nongkynrih, u Bah Prestone u la ïathuh ba dang nyngkong ki la khroh ïa u Bah Gavin ba un wan donlang bad ka NPP namar kadei ka party kaba heh hynrei um shym la treh satia.
“Ka PDF, kum u President pyni pynieng san ne hynriew ngut eh, lada phi pynieng phra ngut yn jop katno ngut eh, lada jop eh uwei ne arngut eh hynrei phin leh aiu te ha madan Polo lah ban thep kol. Balei phim wan sha ka NPP kaba don pura ki nongïalehkai hynrei ki bakla jingkheiñ. Mynta nga khroh ïaphi bad ngim don por ban ïa kdew kti ban kyntu ban jied ïa u kyrtong jongnga na ka NPP namar ha ka 02tarik u Lber u Conrad bad u Prestone kin ñiah ïa ka bos bad ngin synshar ïa ka Meghalaya san snem.”
Shuh shuh u ong ruh ba kin ïakhun ïa ïap ïa im ban pynpoi biang ïa ka Block I bad Block II sha Meghalaya. Nalorkata, u ong ruh ba kumba ki la dep ban maitphang kin sa pynkylla ïa ka Them-ïewmawlong kum ka iew donnam kaban don lut bad ki jaka kyrpang na bynta ki nongdie madan, nongdie waidong khnang ba ka nongbah kan long kum kiwei ki nongbah ba pawnam.
“Hynrei lada kren ïa kata, phin ïohi ba kren ba u Prestone bad u Conrad ki ïalam bakla bad ki thok. Kynnoh u briew ba kita ki high level nga la ju kren ba lada don kita ki high level balei phim ai FIR ban pynkem ïa kum kita. Hynrei kita ki kut tang ha ki nia madan ym dei shuh wat ki nia ha iing,” la bynrap biang u Bah Prestone.
Shuh shuh u ong ruh ba dei ban keiñ noh ïa ki party rit party ria. “Ïoh phi ong ka UDP kaba heh hynrei ngam tharai kan kot wat tang 8 seat ruh. U Bah Allan u la pynpaw ba ha ka party kaba heh ba lada pang ne kdiah uwei u player un mih da uwei pat hynrei kito kiba don tang lai saw ngut, lada kdiah uwei yn wan sa naei pat, la thylli ka jaka. Katta ki leit sha ki paidbah ban ong ba kin leh kambah hynrei kambah aiu keiñ,” u la ong.
Lah ban pynkynmaw ba ha shwa ban phiah constituency thymmai, katei ka thaiñ Laitlyngkot ka hap ha Langkyrdem kaba dei la ju mihkhmat da u Bah Prestone Tynsong kum u MLA.
Na ka liang u Bah Allan pat haba kren kum u kyrtong u la ong ba watla um pat long MDC lane u MLA hynrei ka jingkynthoh pat ïa u ha kine ki ar bnai ba u mih ban pan jingkyrshan ka la mih pynban ka jingkynthoh kaba jur na ki party bapher bapher. “Kane kadei namar ka party ka khie rasong. Kumba long mynta ngi don haduh 49 tylli ki unit ka NPP Sohra bad na kine ki don ruh haduh 40 tylli ki kynhun ba rit ki bym treh ban ïasoh NPP hynrei ki kwah pat ban trei na bynta jongnga,” u la ong.
U la ïathuh ruh ba ha ka jingleit jingïalang kylleng kylleng u ïohsngew markhmat ïa ka jingeh ba ki paidbah ki kynduh khamtam haba ïadei bad ka rep ka riang. “Ngam kwah ban kut tang ha ka sam skim hynrei ban pyrkhat kumno ban ïalam ïa ka constituency ha ka ïoh ka kot na u 2023 shakhmat.”
Shuh shuh u ong ruh ba u dap pat da ka jingkmen haba u poi sha ki thaiñ Laitlyngkot ban shem ba katei ka thaiñ ka sei bun ki nongseng kam lajong watla ki dei kiba rit. “Ha ka por ba ka Hima Sohra kim shah shuh ïa ki bar jylla ban shong iew ha Sohra naduh kiba suh juti, ba suh shatri ba khap shñiuh, to ka por lada ym don ki Nongkynrih, ki nong Laitlyngkot baroh ki nong Sohra ki la heh lut u shñiuh. Ha kane ka thaiñ ki pyni nuksa ïa ka seng kam lajong, na ka sorkar ha ka san snem ban wan ka la dei ban kyrshan ïa kine ki briew ba sengkam ba rit barit ban kyntiew ïa ki briew ha kine ki thaiñ.” u la ong.
U Bah Allan u ong ruh ba ka thong jong u ka long don ha ka party kaba don ha ka sorkar ban plie lad shuh shuh ïa ki paidbah ha ka sengkam sengjam lajong ym ban khmih lynti shuh tang ha ka kam sorkar. Ha kane ka sngi u la ai ka jingïaroh ruh ïa ki bun ngut ki samla rit na katei ka thaiñ kiba la jied ban kamai da ka ba tyrwa shana kiba u ju khot da ki Khasi shana.
Utei u kyrtong u ong ruh ba ki don ki nong Sohra kiba ong ba ym donkam distrik ha Sohra namar ki la biang ki kam ki jam hynrei u ong pat ba kaba sngewlyngoh ka logn ba ïoh ki lok ki khun jong ki kin leit wad kam da la ïoh pat ïa ka distrik.
Ha kane ka sngi la ïoh ruh ïa ka jingkren na kiwei ki nongïalam jong ka party kynthup na i Kong Martina ba ieh noh na ka kam president ka PDF Womens Wing, nanga bah Jied Kurbah President NPP East Khasi Hills, Kong P Nongpluh President NPP Womens Wing bad kiwei.

Leave A Reply

Your email address will not be published.