Shillong, K’lyngkot, 02: Ryngkat bad shi tyllup ka Ri India, la rakhe ïa ka Martyrs Day ha ka 30 tarik u Kyllalyngkot, 2023 ha shnong Kyrphei, East Khasi Hills kum ka dak ban burom bad pyrto ïa baroh kiba la aiti ïa la ka jingim ban pynïoh ïa ka jinglaitluid jongka ri India.
Kane ka sngi ka dei ruh ka lyngkhuh sngi ïap jong u Kpa jong ka Ri India, u Mahatma Gandhi.
Kum ka jingburom bad ban rakhe sah kynmaw ïa kane ka sngi, ka Nangïaikiew Ryntih Village Organisation (NRVO), Kyrphei ryngkat ka jingïatrei lang ka Nehru Yuva Kendra Sangathan, Shillong, ka la pynlong ïa ka jingïalang ba kyrpang ha ka jingdon ryngkat i president jong ka NRVO i Rissida Rynjah.
La pynïaid ïa kane ka jingrakhe da i secretary ka NRVO, i Tiewlinda Rynjah iba la mait phang bad ai jingkren kiba ïadei bad kane ka sngi bad kynmaw burom ïa u Kpa jong ka Ri India, u Mahatma Gandhi.
Ha kane ka sngi la ïoh ruh ïa ka jingkren na u general secretary ka KSU Kyrphei Unit.
Ïa ka jingrakhe la ïashim bynta lang da baroh ki president bad secretary jong baroh khyndai tylli ki Self Help Group (SHG) ha ryngkat ka jing ïadon lang ki dkhot bad ki samla jong ka shnong Kyrphei.
Ha kane ka sngi la ïa don ryngkat i National Youth Volunteer jong ka Nehru Yuva Kendra Sangathan, Mawphlang Block, i Ibakordor Rynjah.
Kum ka dak jong ka jingkynmaw burom, la pynlong ruh ïa ka jingsngapjar kaba ar minit ban kynmaw ïa kito baroh kiba la aiti ïa la ka jingim na bynta ka jinglaitluid jong ka Ri India.
