Sdang ka State Level Inter School Subroto Mukherjee Cup Football Tournament 2023 ha nongbah Shillong
Shillong, Naitung 24: Ka lympung ïalehkai phutbol jong ki lahduh na ki 12 District kiba hapoh ka jylla kaba la tip kum ka State Level Subroto Mukherjee Cup Football Tournament 2023 ka la ïoh ban jam shakhmat hynne ka Lah Sngi U Blei kiba la pynlong ha lai tylli ki madan ïalehkai, kiba kynthup ïa ka SAI Training Centre, Madan Heh Mini Stadium kaba ha Mawlai Phudmuri bad ha Third Ground, Polo (MFA Turf).
Haba phai sha ka jingïalehkai jong ki khynnah ba dang hapoh 14 snem ka rta jong ki shynrang (Under-14 Boys), la ïoh ban pyndep haduh saw tylli ki jingïakhun, ha ka jingïakhun kaba nyngkong ka St Peters Hr Sec School (West Khasi Hills) ka la ïakhaid mar 1 kol bad ka Bamil LP School Mansang (East Garo Hills). ïa kine ki kol la ïoh ban thep da u Banshanskhem Nongphud (33 minit) na ka bynta ka St Peters bad u Tengba A. Sangma na ka kynhun ba ïakhun pyrshah.
Hadien kane, ka Mawbidong Sec School (South West Khasi Hills) ka la shah pynbam kput haduh 12 kol ha ka Umphyrnai Presbyterian (East Khasi Hills), bad ïa ki kol la thep da u Robindor Kyrsian (4,8,40 min), Ricky Kharkongor (10,37,42min), u Gonestar Marwein (35,55 min), Baniar Kharsahnoh (54,57 min), Donestar M.Ngap (10 min), Bankitbok Mylliemngap (32 min).
Katba ha ka lahduh jong ka Eastern West Khasi Hills, kata ka Little Stars English Medium Sec School ka la khur namjop da 5-0 kol pyrshah ïa ka Rongsang A.Bagre Sec School (South West Garo Hills), bad ïa ki kol la thep da u Kerbinson Marwein (13,22 min), Ebenezer Sun (36 min), Kishan Wahlang (52 min), Rishan Lyngkhoi (58 min).
Ha ka jingïakhun ba khadduh hapdeng ka H.K Sing Sec School (West Jaintia Hills) pyrshah ïa ka Monfort Hr Sec School (North Garo Hills), ka jingïalehkai ka la jam sha kaba kut khlem don nongthep kol.
Haba phai pat sha ki jingïakhun jong ki samla lud shynrang ba hapoh ka 17 snem ka rta (Under-17 Boys), ka North Liberty Hr Sec School (West Jaintia Hills) ka la ïakhaid mar 1 kol bad ka Sibsingh Memorial Govt Hr Sec School (West Khasi Hills). ïa ki kol la thep da u Rio Marboh na ka bynta ka North Liberty bad u Rishandabok Marwein ïa ka Sibsingh.
Ha ka jingïakhun kaba bud, ka Assam Rifles Public School (East Khasi Hills) ka la jop haduh 5 kol ïa ka Bakenang Sec School (North Garo Hills), ki kol la thep da u Phermanbha Lyngdoh (2 min) Emanbha Marbaniang (21,39,41 min) Milli August (29 min).
Ka Ri Bhoi Myngken Christian Hr Sec School ka la mad namrem da shi kol ha ka South West Garo Hills Okkapara Sec, bad ïa ka kol la thep da u Weltin Sangma ha ka minit ba 54.
Ka East Jaintia Hills Rymbai Presbyterian Hr Sec
School ka la jop salit da shi kol ïa ka Eastern West Khasi Hills Mairang Presbyterian Hr Sec School, lyngba ka kol na u Bankerbha Dkhar (28 min).
Haba phai pat sha ki jingïalehkai jong ki samla lud kynthei ba hapoh 17 snem ka rta (Under-17 Girls), kaba la pynlong ha Madan Heh Mini Stadium, Mawlai, ka West Khasi Hills Sibsingh Memorial Govt Hr Sec School ka la pynbam haduh 6 kol ïa ka South Garo Hills Telekali SSA UP School, bad ïa kine ki kol la thep da ka Younishna Thabah (23,42,52,26 min), Philasakhi Marngar (27 min), Ibadondor Nongsiet (50 min).
Ka East Khasi Hills Iewrynghep Sec School ka la pynjemkhnap ïa ka West Garo Hills Monfort Dilni Bolchugre da kaba thep haduh 7 kol, bad ïa kine ki kol la thep da ka Ibalari Nongrum (2 min), Ibashembha Khongsit (4,29 min), Ibabarihun Nongsiej (33,58 min), Larihun Songthiang (55 min), Melari Lyngdoh (59 min).
Ka Ri Bhoi Saiden Sec School ka la jop da 7 kol ïa ka North Garo Hills Rongrong Union UP School bad ïa kine ki kol la thep da i Rimeka Khongkai (9,39 min), Daiamon Makhroh (1,14,45,56 min), Baltera G. Momin own goal (28 min).
Ka West Jaintia Hills North Liberty Hr Sec School ka la jop da 6-1 kol ïa ka Eastern West Khasi Hills Little Stars English Medium Sec School. ïa ki kol na ka bynta ka North Liberty la thep da i Samaka Nongrum own goal (3 min), Dakini Shylla (8 min), Daphimon Khyriem (20,46 min), Beatify Shylla (29 min), Eiladki Ksoo (31 min), katba na ka bynta ka Little Stars la thep da i Evamerry Myrthong (9 min).
Yn sa ïoh ban pyntyllung biang ïa ki jingïalehkai mynta ka sngi.