Ka Repport jong ka NITI Aayog, dang shen ka la buh ïa ka Meghalaya kum ka jylla kaba ar ha ka jingduk tam ha ri India. Kaba duk tam kadei ka Bihar. Ha ka thaiñ Shatei lammihngi pat kadei ka jylla kaba duk tam. Hynrei da peit ka jingleh ka sorkar pat i kumba ka Meghalaya kadei ka jylla kaba riewspah shibun, haba ka jingthungkam ïa ki heh ki haiñ kiba khlem da pass Interview ne ka Political Appointment pat ka lobgf kaba shyrkhei haduh katta katta. Kata kadei ka jingthung kam Chairman, Co- Chairman, Vice Chairman, Deputy Chairman bad kumta ter ter.
Ñiuma, ki Sorkar jong ka jylla Meghalaya naduh ka snem 1972 lehse ki don ki Post jong ki Chairman, ki Co Chairman, ki Deputy Chairman bad kumta ter ter ha ki Board, ki Corporation bad kiwei kiwei de ki bor treikam jong ka sorkar. Ka daw ka long ban don ki briew ki bym dei ki briew ki bym dei ki Minister ban long kum ki khlieh jong kine ki bor treikam.
Tangba ka jingïapher ka long ba ki kam Chairman ki don tang khyndiat eh bad kata ruh dei tang kiba shah jied kum ki MLA, kum u Chairman Planning Board bad kiwei kiwei. Hynrei katba nang mih ki sngi bad ha kine ki sorkar kiba hadien lei lei te ka shuki Chairman, Co Chairman, Deputy Chairman, Vice Chairman ka lah long tang kum ka jaka riehtngen ne ka rehabilitation centre ïa kito kiba lah rem ha ka elekshon, kata kiba dei na ki Political Party kiba don ha ka sorkar.
Kaba jur eh ka jingthung Chairman kadei naduh ka por jong u Dr. Mukul Sangma, nangta bud sa ka sorkar u Conrad ha ka MDA-1 bad mynta ha ka MDA-2 lei lei, ka jingbun kiba shah thung kam Chairman kaba ym ithuh i thaw shuh.
Ha ka jylla kaba bun ki Samla ki dang don hapdeng ka jingkyrduh kam, imat na ka bynta ki Politician te ym don satia ka jingkyrduh kam.
Hynrei ka jingkylli kaba mih ka long hato donkam ban don haduh katne katne ki Chairman ha ka jylla? Kaei ka kam jong ki bad ka jingkyli kaba kham khraw ka long kaei ka Contribution jong ki sha ka roi ka par jong ka jylla. Nangta ruh hato ka sorkar ka ju shim ïa ki jingai jingmut jong kine ki Board, ki Corporation ha ka jingtreikam jong ka?. Ne ka shu dei beit tang ka lad aikam aijam ïa ki briew jong ki Party ha kine ki bor treikam.
Uba bun balang hi um sngewtynnad bad um ïahap satia ïa kane ka jingthung kam Chairman kaba khlem pud jong kane ka sorkar bad jong ki sorkar kiba la leit, namar ka dei tang ka jingpynsyrwa kai ïa ka pisa jong u paidbah bad la ïohi ruh ba kine ki bor treikam kim don contribution eiei sha ka roi ka par ne ka ïoh ka kot jong ka jylla.
Ym ju kham ïohi ba kine ki Corporation,ki Board kin shong jingïalang bad lada ki shong ruh imat ki shu shong tang ban ïoh ka sitting allowance lada ki don. Ka jinglut na ka bynta ban siew ïa kine ki shuki Chairman kan long beit da ki klur tyngka ha ka shi snem tang ka jingsiew kum ka tulop ne kum ka honorarium ïa ki, katba u luk u lak pat u hap trud ïa ka maw ka dieng. Ki nonghikai da ki bnai kim ïoh tulop.
Kaba kham i komik na kane ka jingthung kam Chairman ka long ba ki politician kiba u paidbah u la kyntait ha ka elekshon ruh ki dang ïoh jaka ha ka sorkar kum ki Chairman. Nangta ki don lei lei kiba shah thung kum u Nongaibuit syndon jong u Myntri Rangbah ka jylla. Kumno u Politician uba la shah kyntait ha ki paidbah por elekshon un dang long u nongaibuit jong ka u Myntri Rangbah.
Kane ka jingleh jong ka sorkar imat kam kheiñ snep ïa u paidbah uba man la ka sngi u hap ban trei shitom wat tang ban ïoh ka bam kaba thikna, uba shah ïa u slap ïa ka lyer, uba shah ïa ka jingshit jong ka sngi. Kaei eh kata ka Privilege ba kine ki Politician ki don. Kaei ka contribution jong ki sha ka imlang sahlang ne sha ka jylla baroh kawei. Kane kadei kaba ki paidbah kin hap ban buh jingkylli ïa ka sorkar.
