Pyrshah ka KLPMLKLK ïa ka jingweng Lyngdoh jong ka Kur ïa u bah Stophainly Lyngdoh Paliar

By Mawphor News Desk On Jul 25, 2023

Mawkyrwat, ‘Naitung 24: Ka Kur Lyngdoh Paliar Mawkyrda Lai-Kpoh Lai-Kynthei (KLPMLKLK) mynta ka sngi ka 24 tarik u ‘Naitung, 2023 da ka jingsngewkhia ka la lum ïa ka Dorbar Kur ban don ka jingïakren bad ïatai sani kumno ban leh halor ka jingweng noh jong u Syiem ka Hima Nobosohphoh Syiemship ïa u bah Stophainly Lyngdoh Paliar kum u Lyngdoh jong ka Kur khlem kino kino ki jingtip jong ka Kur baroh kawei bad ïa ka jingïalang la pynlong ha ka Hall ha Shnong Umdohlun, South West Khasi Hills District.
Ka jingthmu jong kane ka jingïalang kur ka long ban shim ïa ka rai ne ki synjam kiba kumno kum ka kur kan leh nangne shakhmat ha kaba ïadei bad ki kam jong ka jingleh donbor jong u Syiem ba ula leh lyndet ïa jingweng Lyngdoh jong ka Kur ïa u bah Stophainly Lyngdoh Paliar bad kumjuh ruh halor ka jingthung Lyngdoh Kur ïa u bah Phaiborlin Lyngdoh khlem kano kano ka jingïaleh kaba da ka lynti ne lum ïa ka Dorbar.
Haba kren ha ki lad pathai khubor, u bah Bresswell Lyngdoh Paliar, Adviser jong ka Kur Lyngdoh Paliar Mawkyrda Lai-Kpoh Lai-Kynthei u la ong ba halor kane ka jingpynlong ïa kane ka jingïalang Kur ka long na ka daw jong ka jingpynkyndit ïa ka kur ka jait baroh kawei ba ha ka 4 tarik jong u bnai ‘Naitung, 2023 ka la mih kawei ka hukum na u Syiem jong ka Hima Nobosohphoh Syiemship ba la weng bad suspend ïa ka jinglong jong u Lyngdoh jong ka Kur. “Ngi sngewkyndit namar ha ka jinglap jong ka Kur baroh kawei ba u bah Stophianly Lyngdoh Paliar u Lyngdoh ïa uba kum ka Kur ka la dep ban jied naduh u snem 2018 u khlem leh kano kano ka kam kaba bakla pyrshah ïa ka Kur”, ïathuh u bah Bresswell.
Shuh shuh u la ïathuh ba une u Lyngdoh ïa uba kum ka Kur ka la dep jied bad ba u Syiem ruh u la dep ban ai syrnod u la treikam beit naduh u snem 2018 bad haduh ka 4 tarik jong mynta u bnai ‘Naitung, 2023 kim shym la lap satai kano kano ka kam ba u u leh marwei, hynrei ïa ka jingujor pat la ïoh tang na uwei u briew kata na u bah Breston Lyngdoh Paliar ym na ki paidbah. “Ha ka jingshisha lada don kano kano ka jingujor ne complain, la dei ban wan beit da ka dorbar ne u paidbah, hynrei pynban u wan tang marwei”, ong u bah Bresswell.
Hadien kata ba la wan ka jingujor ha ka ophis jong u Syiem ka hima, u la ïathuh u syiem ruh u la khot ïa ki nongmihkhmat jong ka Kur ban ïakren ïa shai, hynrei ha ka sngi ba u la buh ban ïa kren uta u syiem u khlem wan bad kita ki nongujor ruh ki khlem wan mih ban don ka jingïakren kumta ka la shu kut noh pynban ka shu mih beit ha ka 4 tarik u ‘Naitung, 2023 ba la weng noh ïa u bah Stophianly Lyngdoh Paliar kum u Lyngdoh jong ka Kur baroh kawei.
Namarkata, ka rai jong ka dorbar jong ka Kur ba la pynlong mynta ka sngi ka la shim beit ba Kum ka Kur baroh kawei kan leit beit hapoh ka ïingbishar ne ka High Court ban pynsngew halor ka jingleh jong u Syiem jong ka Hima Npbosohphoh Syiemship namar ka la long kumba u la shu leh donbor ha kaba u la shu thung Lyngdoh khlem ka jingtip jong ka Dorbar Kur baroh kawei kumba la thung ïa u bah Stophianly Lyngdoh Paliar ha u snem 2018. “U syiem, ki sordar ne wat ki nongsynshar ïa ka kam paidbah ba lada don uwei ne ar ngut kiba wan ujor ne wan kyrpad ïa kano kano ka bynta bad hangta u shim beit ïa ka rai ban pyntreikam ne dkhat beit ïa ka bor synshar, ka jingjot ha ka synshar ka khaddar bad ka imlang ka sahlang ka la ap lypa”, pynpaw u bah Bresswell.
Shuh shuh ka rai dorbar mynta ka sngi ka la pynpaw ba kam don jingshaniah shuh ïa u Syiem jong ka Hima Nobosohphoh Syiemship, bad kam ithuh ruh ïa uta u Phaiborlin Lyngdoh u Lyngdoh ba la thuh hi da u syiem bad ban khang ruh ïa u Phaiborlin Lyngdoh ban un wan synshar ïa ka Kur Lyngdoh Paliar Mawkyrda Lai-Kpoh Lai-Kynthei baroh kawei bad halor kine ki bynta kum ka Dorbar ka la ïatai snai ruh ban ai jingtip ruh ha ki bor jong ka distrik kata hapoh ka ophis Khasi Hills Autonomous District Council (KHADC), ophis Deputy Commissioner (DC), South West Khasi Hills District bad kumjuh ruh ha ophis jong u Superintendent of Police, South West Khasi Hills District bad lada une u Syiem jong ka Hima Nobosohphoh Syiemship un phah wan ban synshar donbor hapoh jong kane ka Kur Lyngdoh, ki la rai ba jia katba jia long katba long kum ki paidbah jong ka Kur kin ïeng ïaleh pyrshah.
Katba ha ka jingkren jong uwei na ki Sordar jong ka Shnong Umdohlun, u bah Srotling Thongni uba la ïeng ban kren ruh na ka bynta ki hynriew tylli ki shnong, u la ong ba kane ka jingleh jong u Syiem ka Hima Nobosohphoh ka long kaei kaei ka kam ka bym lah ban pdiang da lei lei namar ha ka por ba ki jied Lyngdoh hapoh ka Kur, ki Sordar Shnong ki don ka jingïatreilang hynrei ha ka por ba weng pat une u Syiem u la shu leh marwei khlem da don kano kano ka jingïakren ïasngewthuh jingmut.
“Kawei pat kaba pynlyngngoh ruh ïa ngi ki Sordar Shnong ka long namar baroh shikata, ka Kur Lyngdoh bad ki Sordar Shnong ki don ka jingïasngewthuh jingmut kumno ban pynïaid beit ïaid ryntih ïa ki kam hapoh ki shnong ki thaw hynrei phewse mynta da kane ka jingleh jong u Syiem ka la pynkyndit ïa ki bad pynlyngngoh ruh”, ong u bah Srotling Thongni.
Ïa kane ka jingïalang la lamkhmat da u Adviser jong ka Kur Lyngdoh Paliar Mawkyrda Lai-Kpoh Lai-Kynthei (KLPMLKLK), bah Bresswell Lyngdoh Paliar ha ryngkat ka jingïadonlang jong ki nongïalam ba hakhmat jong ka Kur kumjuh ruh ki Rangbah, ki longkmie bad ki samla jong ka Kur lem ruh ka jingwan lang ki Sordar jong ki hynriew tylli ki shnong ba kynthup ïa ka shnong Demnar, Nongdiloiñ, Umdohlun, Mawkhlait-ngap, Mawpat bad Mawpat-Nongrim ki shnong kiba hapoh ki jaka jong ka Kur Lyngdoh Paliar Mawkyrda Lai-Kpoh Lai-Kynthei.