Mawkyrwat, ‘Naitung 24: Ka Kyntiew La-I-Sap Multipurpose Organizations (KLISMO) Mawlangwir ka la ïoh ban plie pyrda ïa ka lympung ïalehkai kynjatbol kaba la tip kum ka 2nd Independence Women Football Tournament 2023 ha kaba ïa kane la pynïaleh ha ryngkat ka jingïatreilang bad ka ophis u District Sports Officer (DSO), South West Khasi Hills District, Mawkyrwat ha madan Pyndenïewlyngdoh, Nonglang, South West Khasi Hills District.
Ha kane ka sngi sdang la ïoh ban pynïalehkai sdang ïa ka Brigh Future SSCC kaba na Mairang pyrshah ïa ka Ïawpaw Football Club na Nongnah, ha kaba ka Brigh Future SSCC na Mairang ka la jop pyrshah ïa ka Ïawpaw FC da 5 – 0 kol bad ïa ki 5 tylli ki kol jong ka Brigh Future SSCC la ïoh ban thep da ka Jamhun Ryntathiang 3 kol, ka Airi Khongsit 1 kol bud sa na ka Julita Nongbri 1 kol.
Ha kane ka jingïalehkai na ka liang ki ‘thei ïalehkai jong ka Ïawpaw FC watla ka la ïaleh ban thep ïa ki kol ki jong ki hynrei haduh ka ba kut jong ka jingïalehkai kim shem la lah ban pynphai wat tang shi kol namar ka jinglah ban kyrda na ka liang ki ‘thei ïalehkai jong ka Brigh Future SSCC.
Kiwei pat kynhun kiba la ïoh ban pynialehkai ha kane ka sngi ki long, ka Jashiar Sports Club ka la shah rem noh da 3 – 2 kol ha ka Dirang Football Club lyngba ka Tie Breaker, ka Jakrem Presbyterian Higher Secondary School ka la jop da 4 – 3 kol ha ka Tie Breaker pyrshah ia ka Selajong Football Club bad ka Pyndenumsaw Football Club pat ka la jop noh da 4 – 3 kol pyrshah ia ka Jakrem Sports Club ha ka Tie Breaker.
Ïa kane ka 2nd Independence Women Football Tournament 2023 la wan ban plie pyrda da u bah F.D. Ramsiej u la long kum u kongsan bad kum ka dak jong ka jingplie u la ïoh ruh pynher ïa ka lama jong ka seng.
U bah Benjohnson Lyngdoh u la pynïaid ïa ka jingïalang ba lyngkot i jingkren lyngkot na u bah F.D. Ramsiej kumjuh ruh na u bah Lambokstar Marweiñ ha ryngkat da ka jingïadonlang naduh ki nongkitkam jong ka Kyntiew La-I-Sap Multipurpose Organizations bad ruh ki nongtrei napoh jong ka ophis u DSO, Mawkyrwat.
