Shillong, Naitung 21: Ki jingïalehkai ka lympung ‘Meghalaya Youth League 2024’ kaba nyngkong, ba la pynlong da ka Meghalaya Football Association ryngkat ka jingkyrshan na ka Sorkar Jylla, la ïoh ban sdang ha kylleng ka jylla naduh hynnin ka Sngi Saitjaiñ.
Na ka Zone B, kiba dei ki kynhun ïalehkai na Jaintia Hills, la ïoh ban sakhi ïa ki katto katne ki jingïalehkai kiba itynnat ha ka U-14 bad ruh ha ka U-16.
Ha kyrdan U-14, ka Saipung Block Sports Association ka la khur ïa ka jingjop da 2-1 kol pyrshah ïa ka East Jaintia District Football Association, katba ha ka U-16, ka resol ka la long khongpong, ha kaba ka East Jaintia ka la jop da 2-1 kol ïa ka Saipung.
Ha kane ka juh ka zone, ka Amlarem Block Sports Association ka la jop ha baroh ar tylli ki kyrdan pyrshah ïa ka Laskein Block Sports Association, ha ka kyrdan U-14 ka la jop da 4-1 nangta ha ka U-16 ka la jop da 1-0 kol. U Emon Mylliem u la ïoh ban khyrwit hat-trick ha ka U-14 na bynta ka Amlarem.
Ha ka Zone A, ba kynthup ïa ki kynhun na Garo Hills, kaba don tang kawei ka jingïalehkai, ha ka kyrdan U-14, bad la sakhi ïa ka Tura District Football Association kaba la thom naphang ban pynbam kput haduh 13-0 kol ïa ka Baghmara District Football Association, ha kaba lai ngut ki rangïalehkai ki la ïoh ban khur hat trick, u Watching K Marak, Chegado Ch Marak bad u Adoweanga R Marak.
Related Posts
Ha Shillong, ki kynhun ba hap ha ka Zone C, ki jingïalehkai ki la sdang ha kaba ka Shillong Sports Association kaba pdiang ïa ka kynhun na Ri-Bhoi District Sports Association, ha kaba kane ka kynhun ba ïakhun shabar nala ïing ka la khur ïa ka jingjop, ha ka U-14 ka la jop da 3-0 kol bad ha ka U-16 ka la jop da 3-2.
Ha kiwei pat ki jingïalehkai na ka Zone C, kaba la thmu ban pynïakhun ha ka U-16 ha Jirang hapdeng ka Western Ri-Bhoi Sports Association bad ka Riwar Mihngi Football Association hynrei kane ka jingïalehkai la shah pynthut noh naba jur slap palat, bad baroh ar kynhun ki la ïoh ban khur mar 1 point.
Ha ka Zone D, ka la ïoh ban pyndep haduh lai tylli ki jingïalehkai ha ka shi sngi, bad ki kynhun kiba la khur jingjop ki long ka Nongstoin District Sports Association, Mawkyrwat District Sports Association bad ka Pyndengumiong District Sports Association ha ka kyrdan U-14.
Ka Nongstoin ki la jop suk da 7-0 kol ïa ka Eastern Border Sports Association, katba ka Mawkyrwat ka la pynliem ïa ka Tyrsad Area Sports Association da 3-0 kol bad ka Pyndengumiong ka la pynliem da 5-0 kol ïa ka Mawshynrut Sports Association.
Ha ka kyrdan ïalehkai U-16, ka Nongstoin ka la wanphai hadien ba shah lamkhmat shuwa da shi kol ban pynliem ïa ka Eastern Border 6-1, katba ka Mawkyrwat ka la jop da ka said ïa ka Tyrsad da tang 1-0 kol. Ka jingïakhun kaba itynnat hapdeng ka Pyndengumiong bad ka Mawshynrut ha madan phutbol kaba ha Dommawlum kiba la ïakhaid da mar 3-3.
Ki jingïakhun ha ka sngi sdang ki la jam sha kaba kut da 62 kol ba la pynkhih da 50 ngut ki player jong ki kynhun bapher bapher. Ka wat ïakhun kaba bud kan long ha ka 27 tarik mynta u Naitung.