Mar 25 hajar noh synñiang u MLA sha 2 ngut ki heprit na Ri Bhoi kiba shah jied ban shah pyntbit ha Kerala

Nongpoh, Naitung 21: Ar ngut ki heprit naka shnong Mawlong Ri-Bhoi District kila shah jied ban leit shah pyntbit ïalade haka kam ïalehkai phutbol ha Sportto Soccer Club Residential Academy ka ba dei kawei naki shlem ai jinghikai football kaba la paw haka ri India kaba don ha Wayanad Kerala.

Kitei ki 2 ngut ki heprit ki kynthup ïa u Refinemen Rynshon 14 snem ka rta khun jong ka kong Linan Rynshon, bad u Balawanphai Matong 14 snem ka rta khun jong u bah Jespar Dkhar, kitei baroh arngut ki dei naka shnong Mawlong naki thaiñ umden bad ki la shah jied na katei ka shlem ai jinghikai football ha kaba kin ïoh ïaka lad ban shah pyntbit naki nonghikai ki ba triem bad kiba la paw naka bynta 4 snem bad kin ïoh ruh ban pyndep ïaki kyrdan pule jong ki katba ki dang don hapdeng ka jingshah hikai ha katei ka jylla.

Halor ka jingshah jied kitei ki 2 ngut ban shah pyntbit ha katei ka shlem hikai phutbol kaba don ha Kerala naka liang u MLA ka Nongpoh u Bah Mayral Born Syiem hynne ka step u la ai ka jingkitbok kitrwiang ïa kitei ki 2 ngut ki heprit bad aiti ruh ïaka song pisa kaba mar T.25 hajar ba kin ioh ban pyndonkam haka leit ka wan jong ki.

Naka liang u Bah Mayral Born Syiem u la kyntu ruh ïa kitei ki 2 ngut ki heprit ba kin trei shitom bad pyndonkam hok ïaka sap kaba ki don namar katei ka dei ka kabu ïaki ba kin long ki khlur ïalehkai ka ri shisien ka sngi ryngkat ryngkat bad ka jingpule jong ki khnang ba ka jingangnud bad ka jingkhmih lynti jong ki kmie ki kpa kan nym leh nohei.

U Bah Jespar Dkhar u kpa jong uwei napdeng kitei ki heprit, u la pynpaw iaka jingsngew nguh ïa u MLA ka Nongpoh Constituency u Bah Mayralborn Syiem iaka jinglong kloi jong u ban nong synñiang naka bynta ki jinglut jingsep jong kitei ki heprit ki ban sa leit ban pyntbit ïa lade shabar ka jylla ha kajuh kapor u la ai ruh ïaka jingkhublei ïa u MLA halor ki tien sneng tien kraw kaba u la ai sha ki heprit kiba la don bynta lang ha katei ka sngi.

U la ong ruh kane ka jingleit jong ki khun jong ki shabar ka jylla kam dei ka ba suk iaki kum ki kmie ki kpa namar ka jingsiew kaba hap ban siew ka long kaba la heh, hynrei u la pynpaw ruh iaka jingsngew nguh ia katei ka shlem ai jinghikai football kaba la map mar shiteng iaka jingsiew lyngba ka bai bam (Scholarship). U la ong ruh, wat la ka jingsiew ka long kaba heh hynrei kum ki kmie ki kpa ki la longkloi ban ïa kit ïa bah daka ram tang namar ka lawei kaba phyrnai naka bynta ki khun ki kti.