Khyndiat sngi mynshwa, ka la mih ka jingkynthah kaba jur pyrshah ïa u Conrad Sangma, Myntri Rangbah ka jylla, haba ula kren sha ki kotkhubor, ba ki nongbylla kiba wan sha Ri Khasi, kim donkam work permit satia.
Katei ka jingkren, ka la pynbitar ïa ki kynhun sengbhalang bapher, namar ba ki shim ba katei ka dei ka jingkren lap lah lane ka jingkren tap eit miaw jong u Myntri Rangbah.
Khlem da ïakren ïabun bah ki jnit ki jnat, la tip shai, ba ka Meghalaya ka hab ha ka Sixth Schedule Area bad kumta ki bar jylla, kiba khaïi pateng, ki donkam ïa ka laisen na District Council, kiba bylla, ki donkam ïa ka labour license bad kam dei tang kata, ka sorkar jylla ruh ka don ïa ka labour license jong ka, ha kaba ka ju ai sha kito kiba wan bylla na shabar, namar ba kam dei tang ba kan tip ïa ka jingwan ki nongbylla, hynrei ki da don ruh ki lad jingïarap ïa ki, ha ka pang ka shitom, ka rukom siew bai nong bad wat ha ka jingshah lehbeiñ ha ki nongai bylla.
Kam kut tang katta, nangta kine ki bar jylla, haba ki leit trei, ki hap ban rung ha kano kano ka shnong bad lehse, lada ki leit sha Polo, ki hap ban pyntip sha ki bor jong katei ka shnong, hynrei, kumba ka long mynta, la ïohi, ba kine ki kontraktor jong ka sorkar hi, ba ki pynkheiñ lut ïa baroh ki aiñ jong ka sorkar ne jong ka District Council bad ki wan kit ïa ki khar bylla jong ki katba ki sngew bit na bynta ki kam ki jong ki.
Kam dei tang kata, kat haduh mynta, ki don ar tylli ki aiñ jong ka sorkar jylla, kiba ki dang ïakhun ban ïoh ïa ka jingmynjur jong ka sorkar India bad kitei ki kynthup ïa ka ILP bad nangta sa MRSSA lei, kaba la dep pynlong aiñ da U Mukul Sangma, Myntri Rangbah barim ka jylla, hynrei kaba la pynpulom noh da u Conrad Sangma, da kaba kynnoh, ba ka dei ka aiñ ka bym lerkam bad kitei ki la kren shai, ba ki dei ki aiñ kiba khang ïa ka rung ka mih jong ki briew kiba nabar.
Ka jingkren jong u Conrad Sangma, ka dei ka jingkren kaba pynshit bad kaba lah ban ïalam bakla ïa kiba bun bad kaba pynkhie bitar ïa ki kynhun sengbhalang lei khamtam bad kan long kaba bha, lada kat u Myntri Rangbah, un kham tyngkan ïa ka jingkren jong u, ban lait ka shah wohnia ha kiba bun.
La ju kren na ka por sha ka por, ba ki Myntri sorkar, haba ki kren, ki dei ban peit na ki aiñ, kiba ïasnoh kti halor kano kano ka mat; hynrei kaba sniew bok ba ha kane ka sorkar kaba mynta, la ïohi, ba ki don shibun kiba kren kai, kiba kren biria, kiba kren ban ïoh sieh briew na Secreteriat, kaba dei ka ophis kaba synshar ïa ka jylla baroh kawei bad ka dei na kane ka daw, ba haba la bun eh ki riew biria ne joker, ba la ïoh lad sa u paidbah ban ïa sieh briew bad ïa kawang ktieh, haduh ba la sngew jli tang ban ïa sngap ruh.
Lah ban ong ba haduh kine ki sngi na ka liang ki sengbhalang ba kynthup ïa ka KSU bad HYC nalor kiwei pat ki la pynlong ïa ka jingkhynra ïa ki mynder ri kiba wan buhai shnong bad kiba wan bylla sha kane ka jylla ha ka rukom ka jingwan trei bylla hynrei khlem ki kot ki sla kiba biang.
Bad namar ka jingbym lah jong ka sorkar ban pyntreikam ïa ki aiñ kiba lah don lypa ka la pynlong ïa ki sengbhalang ha kane ka kynti kaba mynta ban ïatreilang ban khynra mynder kiba wan sha kane ka jylla khlem ki kot ki sla kiba biang bad kum ki sengbhalang kidei ruh ban sngewthuh ba kim dei ban kwah burom.
