Shillong, Naiwieng : Ka Mawkynrew Cup Committee (MCC) ha ka 01 tarik u Naiwieng, 2022 ka la plie pyrda ïa ka lympung ïakop ïalehkai phutbol kaba la tip kum ka (L) Jien Pyngrope Memorial Invitation Football Tournament 2022 ha madan ïalehkai phutbol ka shnong Jongksha.
Ha kane ka sngi, la plie pyrda ïa kane ka lympung da u Bah Banteidor Lyngdoh, MLA ka Mawkynrew Constituency bad Myntri ba dei khmih ïa ka tnad kam ïalehkai ka Sorkar Jylla kum u Kongsan.
Ïa kane ka lympung la ai nam ha ka kyrteng u Bah Jien Pyngrope (bam kwai ha dwar U BLEI) uba long uwei na ki nongshong shnong uba noh synniang ïa ka imlang sahlang ha katei ka thain.
La ïa donlang ha kane ka sngi da u MLA ka Mawphlang constituency u Bah Eugeneson Lyngdoh kum u symbud kongsan bad uba dei ruh u President ka Shillong Sports Association, u Bah Gavin M Mylliem, MLA ka Sohra constituency, ki paidbah nongshong shnong katei ka thain bad kiwei.
La pynshongkun bad pynphuh pynphieng ïa kane ka lympung lyngba ka jingïashim bynta ki jingïashim bynta jong ki 17 tylli ki skul jong katei ka thaiñ ha ka marchpass, ryngkat ki jingrwai, ki jingshad na ki khun samla katei ka thaiñ.
U Bah Banrteidor ha shwa ka jingplie pyrda ïa kane ka lympung u la plie pyrda ruh ïa ka jingtei na ka bynta ka rynsan peitkai ryngkat ka jingker jong baroh sawdong ha ka jinglut kaba T. 64 lak na ka State Sports Council, Meghalaya.
Na ka jingïakhun sdang jong ka lympung, ka 2Tourist ka la lah ban pynliem ïa ka Shillong Lajong FC da ka 4 la 3 kol lyngba ka Tie Breaker hadien ba kim shym la lah ban ïathep kol ha ka por ba la buh.
