Jowai, Naiwieng 01: Ka lympung ïalehkai phutbol jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha madan Kiang Nangbah Stadium, Dongmihsngi Jowai.
Ïa kane ka lympung la pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun na ka liang ka kynhun ïalehkai jong ka Nangbah Iawmusiang SC kala lah ban pynliem da 4-1 kol ïa ka Evergreen Mukhla SC, ïa ki kol na ka Nangbah Iawmusiang SC la thep haduh lai kol da u Malvern Lyngkhoi kata ha ka minit ba 12, 22 & 54 bad u Nikhil Lyngkhoi ha ka minit 57.
Katba na ka liang ka Evergreen Mukhla SC la thep da u Teddyson Bang haka minit ba 42, haduh ba kut jong ka jingïakhun kala neh da 4-1 kol.
Ka jingïalehkai lashai ka sngi 02 tarik u Naiwieng kan long hadpeng ka Sailung Ialong SC pyrshah ïa ka Shangpung Moosyiem SC haka por 2 baje shiteng nohphai sngi.
