Shillong, Naiwieng : Ka Mylliem Lum Sports Association ka la pynkut noh ïa ka Invitation bad U-14 Football Tournament kum ka jingrakhe ïaka jingdap 10 snem jong MLSA ha ka 29tarik mynta u bnai ha Madan ïalehkai Umlympung 12 mer.
Ha kane ka juh ka sngi la pynlong ruh ïa ka Inter School Drill bad March Pass Competition naka bynta ki skul ba hap hapohbka thain Mylliem Lum.
La sdang ïaka program naduh ka por 10 baje mynstep ha kaba u Bah Gavin Mylliem, MLA Sohra u la wan kum u kongsan ban plie ïa ka Inter School Drill bad March Pass Competition ha kaba la wan ban ïa shim bynta da ki san tylli ki skul ba paw ka thain. Ha ka jingïaknieh nam lahduh hapdeng ki skul, k a Mawwan UP School kala jop ïa ka nam lahduh ha baroh 2 tylli ki Competition kata ha ka Drill bad March Pass Competition, katba ka Skul St.Peter’s H.S School, Rangbihbih ka la wan ha ka kyrdan ba ar ha ka Drill bad ka skul Valley View Umsaw ka la wan ha ka kyrdan ba ar jong ka March Pass Competition.
Ha ka por shiteng sngi la wan ban donlang da u Bah Hamlet Dohling, MLA Mylliem ba dei ruh u Adviser ka MLSA. Ka jingïakhun ban ïaknieh ïa ka nam lahduh jong ka U- 14 Football Tournament ka la long hapdeng ka 12mer bad Mawpynthih. Ha ka jingïakhun kaba mar ïa ryngkat bor bha khlem don ba lah ban thep kol bad lyngba ka jingïashut Tie Breaker ka 12mer ka la pynliem noh da 3 la 4 kol pyrshah ïa ka Mawpynthih ban jop ïaka nam lahduh.
Haka jingïakhun ha ka Final jong ka Invitation Football Tournament kaba la long ka hapdeng ka Mylliem bad Umtyngar, ka Umtyngar ka la pynliem noh ïa ka Mylliem da 4 la 2 kol bad rah ïa ka nam lahduh kynthup ïa ka song pisa ba arphewsan hajar ryngkat ka trophy katba ka Mylliem pat ka ïoh ka song pisa ba shiphew hajar ryngkat bad ka Trophy.
Ha kane ka sngi la pynkupburom kyrpang ruh ïa u samla Teiboklang Marbaniang na Rangbihbih, Mylliem Lum u ban sa leit ban ïa shim bynta haka WAKO International Kick Boxing ka ban sa long shen ha New Delhi.
