Sdang ka Inter School Athletic Meet u DSO ha Ri-Bhoi
1 minit pynlong jingsngap jar ban kynmaw ïaka samla Ritina Hanse.
Nongpoh, Ïaiong 22: Kumba ju leh manla u snem ban ai rynsan bad kyntiew ïaki samla kiba don sap haka kam ïalehkai sports, ka ophis u District Sports Officer, Ri-Bhoi District kala shim biang ïaka sienjam ban pynlong ïaka lympung District Level Inter School Athletic Meet 2026, bala plie pyrda ïaka mynta ka sngi ha madan NSCA Pahamsyiem.
Ïa katei ka lympung ïalehkai sports la wan ban plie pyrda da u Bah Orville Massar Additional SP ka Ri-Bhoi kum u kongsan bad u Narayan Upadhyay IPS kum ka symbud kongsan haka jingdon lang u Bah Bobby L Nongbet District Sports Officer, ki principal ki nonghikai bad ki khynnah skul kiba la shimbynta shitrhem ha katei ka sngi.
Ha katei ka lympung la wan ruh ban ïa shim bynta haduh 1350 ngut ki khynnah skul na 45 tylli ki skul bapher bapher na kylleng ka Ri-Bhoi District ki ban sa aireng haki lympung lehkai bapher bapher.
Ha kane ka sngi kum ka jingkynmaw burom ïaka Samla Ritina Hanse ka thei ïalehkai kaba nyngkong na Ri-Bhoi ban khur takma ksiar na bynta ka jylla ha ka 29th East Zone Junior Athletics Championship kaba la long ha u snem 2017 ha Kolkata kyrdan U-16, naka liang ka ophis u DSO kala pynlong ruh ka jingsngap jar ba 1 minit ha madan NSCA Pahamsyiem.