Mawkyrwat, Ïaïong 22: Ka Ïalam Sngewbha Football Academy ka la pynkut noh ïa ka jingïalehkai 1st Inter School Football Tournament jong ki khynnah shynrang ha ka kyrdan jong kiba hapoh ka 13 snem ba la long ha madan Thangrai- Nongnah, South West Khasi Hills District.
Ki ar tylli ki team kiba la poi sha ka jingïakhun phainal ki long ka Shnongkalong Government LP School pyrshah ïa ka Holin Merorail LP School Nongnah-Nongkdait. Kane ka jingïalehkai ka long kaba itynnad bad jingïakhun tyngeh bha, hynrei ym shym la don ba lah ban thep kol haduh kaba kut jong ka por jingïalehkai bad ruh ha ka extra time.
Hadien kata, ban rai ïa ka kynhun kaba jop la shu pynïalehkai noh da ka Tie Breaker, ha kaba ki ar team ki la ïakynjat haduh 9 ngut ha kaba ka Shnongkalong Government LP School ka la ioh ban khur ïa ka jingjop da 5 – 4 kol.
Ha kane ka sngi, la wan ban pynshngaiñ bad kyrshan da ki kmie ki kpa jong ki khynnah skul bapher bapher, ryngkat ka jingdon lang u Bah Michael Donald Lyngdoh, Community Coach Nongnah, bad u Bah Bhaboklang Syiemlieh, Chairman jong ka Block Ranikor kum u kongsan.
