Jowai, Ïaïong 26 : Ïa ka Chief Minister District Level Inter School Athletic Meet ba la pynïaid da ka ophis jong u District Sports Officer (DSO) West Jaiñtia Hills ryngkat ka jingïatreilang ka West Jaiñtia District Sports Association (WJDSA) kala sdang mynta ka sngi 26 tarik bad yn pynkut ha ka 28 tarik mynta u bnai ha Kiang Nangbah Stadium Ladthadlaboh Jowai.
Ïa kane ka lympung ïalehkai Sports Athletic la wan ban ïashim bynta da ki 31 tylli ki skul hapoh ka District, ha kaba la wan ban pynher ïa ka lama da ka District School Education Officer, ka West Jaiñtia Hills District ka kong A.P. Syiem.
Hashaw kane la don jingïalang bad la ïoh ruh ka jingkren na ka Kong Syiem, kaba la ai khublei ïaka ophis u DSO kaba la shim ka jingkitkhlieh manla u snem ban pynlong ïa kane ka jingïalehkai na ka bynta ki khynnah skul khnang ba kin ïoh ban pynpaw pyrthei ïala ki sap ki phong ba ki don. Ha ka juh ka por ka ai khublei ïa ki Principal jong ki skul bapher bapher kiba la ai lad ïa ki khynnah skul ban ïashim bynta ha kane ka lympung.
Kala buh ruh ka jingkyntu ïa ki khannah kiba la poi shakhmat ha ki jingïakhun ba kin ïaleh shitom shuh shuh ban ïashim bynta ha ki lynpung ba kham shalor, khnang ba kin wanrah ruh ïa ka nam bad ka burom jong ka District bad ka jylla hi baroh kawei.
Ha kane ka sngi sdang la wan ban ïadonlang ruh da u DSO ka WJHD ma K. Pasah, President WJDSA ma EMH Passah, Vice President WJDSA ma Patrick Lamare, ki nongkitkam ka WJDSA, ki nonghikai bad ki nongpynïaid ïa ka lympung.
Ha kane ka lympung la don ki jingïakop kiba kynthup ïa ka jingmareh 100 Meters, 200 Meter, 400 Meter, 800 Meter, 1500 Meter, 3000 Meter, Long Jump, High Jump, Shoot Put, Discus Throw, Javelin Throw bad Relay Race.
