12 tarik Jymmang yn sdang ka Meghalaya State League, 25 tylli ki club ban ïashim bynta

Shillong Zone – Mawlai SC, Jyntru, Seng Samla Laitryngew, Umkseh SC, Langsning SC, Umrit SC
Jowai Zone – Niaw Wasa United, Rymbai Iawpynsing SC, Mulait United FC, Sein Pynbhalang SC, Rangdajied United FC, Ladthadlaboh SC, Youth Club Pdengkarong
Mawkyrwat Zone – Pyndengrei SCSC, Mawten SC, Riangdo YSCA, Seven United SCCC, Lumdiengngan SC, Shillong Lajong FC
Tura Zone – Chipakkore FC, Warima YC, Wasa FC, Atong Matgrik FC, Khliehmawlieh YC, Selsella Sports Association

Shillong, Ïaïong 26 : Ka wat kaba lai jong ka Meghalaya State League kan sdang ha u bnai Jymmang kaba dei ruh shi bynta ka thong jong ka Meghalaya Football Association ban kyntiew shuh shuh ïa kane ka jait jingïalehkai hapoh ka Jylla.
Ha kane ka lympung kin don arphew san tylli ki club kiban sa ïashim bynta kaba dei ruh ka sien kaba nyngkong ban don bun tylli ki club na kylleng ka Jylla kiban ïashim bynta ha ka MSL, ïa kaba la phiah ha ki saw tylli ki group.
Ïa ki jingïalehkai yn pynlong ha Tura, Mawkyrwat, Shillong bad ha Jowai kaban sdang naduh ka 12 tarik Jymmang 2023. Ïa ki jingïakhun semifinal yn pynïalehkai mar arsien ba kynthup ka jingïakhun ha la ïing bad shabar na la ïing home &away), bad ïa ka jingïakhun phainal yn pynlong ha Nongbah Shillong.
Ïa ka MSL 2023 la dep ban plie paidbah ha State Convention Centre ha ka sngi Balang, ha kaba u President jong ka MFA u Bah Larsing Ming Sawyan, ki Vice-President u Gino Sangma bad EMH Passah, Joint Secretary Dipshon Ryntathiang, kiba mihkhmat na ki state association, ki kapten jong ki team nalor kiwei kiwei ki la ïadonlang ha kane ka sngi ba pyllait paidbah ïa ka trophy, ka website jong ka MSL (themsl.in), ka jingrwai (theme song) bad ka music video ba la rwai da ka Jessie Lyngdoh bad ka kynhun.
Khatduh la pynlong ïa ka MLS ha u 2019, ha kaba ka Shillong Lajong ka la ïoh rah ïa ka nam lahduh, hynrei naduh utei u snem, ym shym la pynlong shuh na ka daw ka jingwan lyngshop ka khlam COVID-19. Ka jingwanphai pura biang ka jingïalehkai phutbol ha u snem ba lah dep ka la ailad ïa ka MSL, kiba bun ki club radbah kiba ïashim bynta ha katei ka league ba la pynïaid da ki association jong ki district kiba pynïasoh bad ka MFA, kaban sa pynlong mynta u snem.
Haba ai jingkren ha kane ka sngi, na ka liang u President jong ka MFA u Bah Larsing Ming Sawyan u la ong, “Mynta ka la wanphai biang ryngkat ka jingthew kaba thymmai ban kyntiew ïa ka jingïalehkai phutbol sha kawei pat ka kyrdan.”
U Bah Ryntathiang dang shen u la pynpaw ba ka Meghalaya ka la thaw history ha ka SXantosh Trophy (Men’s National Football Championship) ha kaba ka la pyndep ïa ka nam ba ar hadien ba ka la rem noh ha ka Karnataka ha ka jingïakhun phainal.
Halor kane na ka liang u Bah Larsing u la ong, “Yn ym ïoh shuh kat ïa ka jingïalehkai Santosh Trophy kaba mynta u snem. Ka Meghalaya ka la ïoh rung sha ka final round ha ki 4-5 snem ba lah leit noh. Na ka jingieit bad jingkyrshan jong ki paidbah ngi la rung sha ka phainal hynrei ngi donkam ban ïoh poi sha ka thong namar ba ngim pat jop ïa ka nam lahduh.”
Ban nang pynkhlaiñ ïa ka jingïalehkai kynjat bol hapoh ka Jylla Meghalaya, ka MSL kan ym pynleit jingmut tang na ka bynta ki shynrang, hynrei kan kyntiew naduh kiba dang rit. U Bah Larsing u la pynpaw ruh ka jingdonkam jong ka Golden Baby Leagues ba ka la dei ban pynlong ha manla ki district naduh u snem ban wan. Dei ka MFA kaba la sdang ïa ka Golden Baby League ha u snem 2018, bad na ka liang ka All India Football Federation ka la pynïaid shaphrang ïa katei ka project ha kylleng jong ka ri India.
“Khlem da sdang naduh tynrai kan ym kiew lano lano ruh. Lada ngi pynleit jingmut tang na ka bynta ki senior ngim ym poi sha ka thong kaba ngi kwah. Kumta ka jingthew kaba na ka bynta u snem ban wan ka long ba baroh ki district association kin sdang ban pynlong noh ïa ka Golden Baby Leagues khnang ban kyntiew ïa ka jingïalehkai phutbol. Lada ngi la kynjoh sha kata ka jingthew kaba ngi la buh hakhmat ngin sa ïoh ïa kaba ngi kwah,” la ong u Bah Larsing.
Haba pynpaw ïa ka jingïalehkai phutbol jong ki kynthei, u Bah Larsing u la ong ba ka kynhun ïalehkai phutbol jong ka ri India ka don ha ka kyrdan ba 50 ha ka ranking kaba la tam ban ïa ka kynhun jong ki shynrang. “Ka kabu ban ïoh ïalehkai World Cup ka kham don jingkyrmen na ka bynta ki kynthei bad ka Meghalaya kadei ban don bynta ha katei ka jingïaid lynti.
U Bah Larsing Ming Sawyan u la ai khublei ruh ïa ka Sorkar Jylla khamtam eh ïa u Myntri Rangbah, u Myntri jong ka tnad Sport bad Commissioner and Secretary jong ka Sports and Youth Affairs, kiba la lah ban pynurlong ïa ka MSL, ha kaba ïa katei ka tournament la kyrshan pisa 100 percent lyngba ka sorkar Jylla.
Mynta u snem, yn sdang nyngkong ïa ka MSL ha Jowai kaban long ha ka 12 tarik Jymmang ha madan Kiang Nangbah Stadium.
Ha ka Jowai zone ki don hynñiew tylli ki team, katba ha ki lai tylli kiwei pat ki zone ba kynthup ka Tura, Shillong bad Mawkyrwat ki don hynriew tylli ki team ha katei ka lympung kaba don baroh 25 tylli kiban ïashim bynta.
Ha ka sngi Sdang ha Jowai, ki ar tylli ki team kiban mih madan nyngkong kan long hapdeng ka lahduh jong ka MLA jong ka samoi 2017-18 ka Niaw Wasa United pyrshah ïa ka kynhun ba wan ba ar ha u 2019 ka Rangdajied United.