Shillong, Naiwieng 07: Ka Jal Diwali -”Ka Campaign na ka bynta ki longkmie ïa ka um, ka um ïa ki longkmie” hapoh ka Housing and Urban Affairs ka la sdang mynta ka sngi ha Meghalaya lyngba ka jingrakhe ha Urkhla Water Treatment Plant, Jowai.
Ka tnat Housing and Urban Affairs jong ka Sorkar India ka dang pynlong ïa ka ‘Campaign na ka bynta ki longkmie ia ka um, ka um ia ki longkmie’ ban rakhe ia Jal Diwali naduh ka 7 tarik haduh ka 9 tarik u Naiwieng, 2023. La ialam ïa ki dkhot jong ki SHG jong ki longkmie DAY-NULM sha ki jaka pynkhuid um ne ki Water Treatment Plant (WTP) ba kin sngewthuh ïa ki rukom treikam ha ka jingpynbiang ïa ka um kaba khuid bad kaba shngaiñ sha ki longiing. Ka jingthmu jong kane ka jingleit sha kine ki jaka ka dei ban wanrah ïa ka jingsngew lajong bad ka jingsngew trai ha ki longkmie ha kaba ïadei bad ki jingdon jingem kiba ïadei bad ka um.
Kane ka jingleit ha Jowai ka la sdang da ka jingai jingkren da ka City Coordinator, DAY-NULM, Jowai ka Kong Emica S. Rymbai kaba la pdiang burom ïa ki ophisar na AMRUT, DAY-NULM, PHE bad ki SHG kiba la wan iashim bynta ha kane ka prokram.
Ha ka jingiakynduh bad ki paidbah, ki ophisar na ka AMRUT, ki nongpynïaid na ka jylla bad ka nongbah ki la batai shaphang ka thong jong kane ka campaign bad ka jingdonkam jong kane ka jingleit peit ia kine ki jaka pynkhuid um. Ki la pynshlur ïa ka jingiashim bynta ha kane ka prokram khnang ban pynïar ïa ka jingsngewthuh shaphang ka kam pynpoi um ha ka nongbah jong ki.
U SDO, PHE ba dei peit ïa kane ka jaka pynkhuid um, u Bah Roskil Challam u la pyni ïa ki ophisar bad kito kiba wan ïashim bynta ïa ki bynta bapher bapher jong kane ka jaka pynkhuid um bad u la ai jingbatai ruh shaphang ka kam ba trei ha kane ka jaka. Ki nongiashim bynta ki la buh shibun ki jingkylli ïa ki ophisar shaphang kane ka jaka pynkhuid um. Ki la ai jingsngewnguh ruh ïa ka tnat kaba la pynlong ïa kane ka prokram ha ka Diwali.
Hadien ba la dep pyni ïa kane ka jaka treikam, ka la don ka jingialang ban ïoh ia ki jingmut jingpyrkhat jong ki nong iashim bynta. Ki ophisar ki la batai ïa ki kam bapher bapher ha ka jingpynkhuid um. Ha kane ka jingiakren bad ki dkhot SHG, ki ophisar ki la ban jur halor ka jingkongsan jong ka um bad ka jingdonkam ban pynneh ia ka.
Ïa ka Jal Diwali yn pynlong ha 3 tylli ki ULB ha kylleng ka jylla Meghalaya ha kaba yn leit peit ïa ki jaka pynkhuid um naduh ka 7 haduh 9 tarik u Naiwieng, 2023. La pynkhreh ban don kum kane ka jingleit peit ïa ki jaka pynkhuid um ha ka 8 bad 9 tarik u Naiweing ha ka Mawphlang bad Nongstoiñ ULB.
