Shillong, Naiwieng 07: Kum shi bynta jong ka jingrakhe ïa ka Lyngkhuh Snem ba 74 jongka jingseng nongrim ïa ka Bharat Scouts and Guides, mynta ka sngi la pynlong ïa ka Rajya Puraskar Rally ha Raj Bhavan, Shillong ha kaba u Lat ka jylla u Phagu Chauhan, uba long u Patron jongka Meghalaya Bharat Scouts and Guides ula sam ïa ka khusnam Rajya Puraskar.
U Lat ka jylla ula sam ïa ka khusnam Rajya Puraskar ne Governors Award sha ki 84 ngut ki Scouts, 9 ngut ki Rovers, 76 ngut ki Guides bad 9 ngut ki Rangers ha kaba la ïa don lang u Chief Secretary ka jylla u Bah D.P. Wahlang, u Secretary jongu Lat u Dr. B. D. R Tiwari bad kiwei kiwei.
Nalor kane la pynkup burom ruh ïa ki 7 ngut ki Leaders kiba kynthup ïa ki 5 ngut ki shynrang bad 2 ngut ki kynthei kiba la pyndep ïa ka Himalayan Wood Badge Course.
Haba kren ha kane ka jingïalang, u Lat ka jylla ula ïaroh ïa baroh ki Scouts bad Guides kiba la pyndep ban ïoh ïa ka khusnam Rajya Puraskar bad ula ong ba ka jingrakhe ïa kane ka sngi ka long kum ka jingpynkynmaw ïa ka jingïohi jngai jong ki nongseng, kiba ai jingithuh ïa ka jingkongsan ki Scout bad ki Guides ha ka ban pynwandur ïa ka jingim jong ki samla.
U Lat ula kyntu ïa ki Scouts bad ki Guides ba kin ïeng skhem ban bat ïa ka jingkular halor ki nongrim kaba ïeng ka Bharat Scouts & Guides bad ban shim ïa ka bynta ban kyntiew ïa ka roi ka par jong ki samla bad ban pynthikna ba kan don ka lawei kaba phyrnai ïa ka ri.
Ula ong, ba ka sorkar ka pynthikna ban kyntiew ïa ka kam kaba ïadei abd ki Scoiuts & Guides ha ka jylla.
Katba u Bah D.P Wahlang ula ïaroh ïaka jingtrei shitom ki scouts bad guides, ka jingïeng skhem ha ka nongrim bad ka jingtrei shitom ka jongki haduh ban ban pyndep ban ïoh pdiang ïa ka khusnam Rajya Puraskar.
U Lat ka jylla ula pyllait paidbah ïa ka Foundation Flag bad kaei kaba ïoh na ka jingdie yn sa phah sha ka National Headquarters jongka Bharat Scouts and Guides khnang ba yn lah ban pyndonkam na ka bynta ban ïarap sha ki duk ki suk kiba don ha kylleng jong kane ka ri.
