Nongpoh, Naiwieng 07: Ka KSU North Khasi Hills District, Eastern Border Area lem bad ka Raid Nongtung Circle hapoh ka jingïalam u Samla Banjop Maring President Eastern Border Area, mynta ka sngi kala leit ban ïakynduh syndon ïaka Dr TS Momin DMHO ka Ri-Bhoi District halor shibun ki jingduna bad jingdkoh treikam jong ka Mawlasnai PHC kaba shakri sha ki hajar ngut ki paidbah ka thaiñ khappud, bad buh jingeh ïaki paidbah ha kaba ïadei bad ka jingsumar haka liang ka koit ka khiah namar wat tang i jingpang barit la hap ban leit sha kiwei ki jaka.
Naka liang ka seng kala pynpaw ruh sha ka DMHO ba kum ka seng kala ioh ruh ka jingujor ba ka doctor kaba don ha katei ka PHC kam long kaba thikna nalor ka jingbun jong ki nongpang bala donkam shuh shuh ban pynbun ki doctor bad nongtrei khnang ba katei ka jaka sumar kan lah ban ai ka jingshakri sha ki paidbah nalor kiwei ki jingduna ba kynthup ïaka um, ka jingkhapngiah ka jaka shim dawai ba ka sorkar ka dei ban shimkhia mardor.
Haba kren sha ki lad pathai khubor naka liang u Samla Banjop Maring u la ong ba kum ka seng ka dap da ka jingsngewkhia halor ka jingujor jong ki paidbah na katei ka thaiñ halor ka jingdkoh treikam ka Mawlasnai PHC kaba la buh jingeh shikatdei ïaki paidbah kiba pang ba shitom. U la ong ruh ba kum ka seng kala pynsngew sha ka DMHO halor ka jingbym biang doctor namar kumba long mynta ka doctor ka don tang kawei ha katei ka jaka sumar nalor ka jingbym thikna bala donkam ruh ban dang pynbun shuh shuh ki doctor kiba thikna bad kumjuh ruh ki nongtrei ban ai ka jingshakri sha ki paidbah.
U la ong ruh ba ka um kam long kaba thikna ha katei ka PHC kaba dei kawei naki jingdonkam ba hakhmat eh, bad kumjuh ruh ka jingkhapñgiah palat jong ka jaka shim dawai bala donkam ban pynheh ha kaba naka liang ka DMHO kala kular ban shimkhia bad kumjuh ruh ban pynsngew sha ka sorkar. Hakajuh ka por u la ong ruh ba naka liang ka seng kan sa leit ruh ban ïakynduh ïaka kong Ampareen Lyngdoh myntri ka tnad ka koit ka khiah bala donkam ban kyntiew kyrdan noh ïakatei ka PHC sha ka CHC namar katkum ka jingbunbriew la donkam ban kyntiew kyrdan noh ïa katei ka PHC sha ka CHC naka bynta ka jingbit jingbiang jong ki paidbah kiba leit ban shim dawai bad phah sumar, u la bynrap.
