Plie pyrda ka HYC ïa ka 3rd Tur Shaphrang Knockout Football Tournament 2023 ha Kenïong
Mawkyrwat, ‘Naiwieng 06: Ka Hynñiewtrep Youth’s Council (HYC) jong ka Kenïong & Thiepdiengngan Unit ka la ïoh ban plie pyrda ïa ka lympung ïalehkai kynjatbol kaba la tip kum ka 3rd Turshaphrang Knockout Football Tournament 2023 ha madan jong ka shnong Kenïong, South West Khasi Hills District.
Ki kynhun kiba la ïoh ban ïalehkai ha ka sngi plie pyrda ki long ka Thongni Football Club pyrshah ïa ka Dong Thiepdiengngan Football Club bad ka jingïalehkai hapdeng jong kine ki ar tylli ki kynhun ka la long kaba itynnad bha bad ka jingïalehkai ruh ka la long kaba ïa biang bor namar katduh ba kut jong ka jingïalehkai ha ka kyllastep bad ka kyllamiet ki la ïoh ban ïa thep mar ar kol.
Kumta ban rai ïa ka kynhun kaba jop, na ka liang ki nongpynïaid ki la shu pynïaleh noh da ka Tie Breaker ha kaba Thongni Football Club ka la jop noh da 4 – 2 kol pyrshah ïa ka Dong Thiepdiengngan Football Club
Ïa kane ka lympung ïalehkai kynjatbol jong ka 3rd Turshaphrang Knockout Football Tournament 2023 la wan ban plie pyrda da u bah Mandilos Nongbri, Vice President jong ka HYC South West Khasi Hills kum u kongsan ryngkat ka jingïadonlang u bah Ialam Rngaid kum u symbud kongsan.
Ha kajuh ka sngi, na ka liang ka HYC Kenïong & Thiepdiengngan Unit ka la ïoh ruh ban pynkup burom ïa u bah Mandilos Nongbri uba la jop ïa ka nam lah duh ha ka jingïakop ñiah kali kaba la tip kum ka “Off Road Challenge AHOR 2023” ha kine ki bnai kiba la dep.
Haba kren ha ka jingïalang ba lyngkot, u bah Mandilos Nongbri u la ai mynsiem na ka bynta ki ‘rangïalehkai kiba la mih sha madan ban ïakhun bad u la ong ruh ba haba ki don hapdeng ka jingïaleh kim dei ban duh mynsiem ne kynran dien noh hynrei ki dei ban don ka mynsiem jong ka jingtrei shitom long kiba ïai shah namar ha ka jingïalehkai kin don beit kiba rem bad kiba jop. “Kiba jop kim dei sngewsarong noh, hynrei ki dei ban nang ïai ïa khun teng eh shuh shuh bad kiba rem ruh kim dei ban duh mynsiem pynban da ka jingrem jong ki kin buh pat ïa ka mynsiem ban trei shitom ha kiwei pat ki por”, u la ong.
Ha kane ka sngi la ïadonlang ruh naduh ki nongkitkam ba hakhmat jong ka Hynñiewtrep Youth’s Council (HYC) jong ka Kenïong & Thiepdiengngan Unit lem ruh ki nongwan peit kai ïa kane ka lympung ïalehkai kynjatbol.