Nongpoh, Naiwieng 07: Ka Meghalaya Weightlifting Association ha ka 4 tarik u Naiwieng 2023 ka la lah ban pynthymmai biang noh ïa ki nongkitkam jong ka Association, kaba dei hadien ba ka samoi treikam jong u snem 2018 haduh 2023 ka la poi noh sha kaba kut bad na ka bynta ban pynïaid shaphrang ïa ki kam shakri ka seng ban kyntiew ïa ki samla don sap ha kam ïalehkai weightlifting ka seng ka la lah ban jied biang ïa ki nongïalam ba thymmai ha ka jingïalang kaba la long ha Nongbah Shillong.
Kine ki nongïalam ba thymmai ka Meghalaya Weightlifting Association ki kynthup ïa u Bah Donald Rymbai kum u President, Vice President, u Bah Flanagan Kharwanlang, General Secretary, Batskhem Basaïawmoit bad kynthup kiwei kiwei ki dkhot bad ki nongïalam kane ka Association.
Haba ïa kren bad ki Nongthoh Khubor mynta ka sngi, u Bah Donald Rymbai kum u President ba thymmai kane ka Association, u la ai khublei kyrpang naduh ki nongïalam barim bad kumjuh ruh ki nongïalam ba thymmai bad ka thong kaba kum ka Association ka long ban dang kyntiew ïa kane ka jaid jingïalehkai sport kaba dang dei kaba thymmai, ba bun ki khun samla hapoh ka jylla kim pat da tip thikna shaphang kane ka jingïalehkai sport.
U la ong ruh ba kum u President ba thymmai u sngewkmen ba la lah ban jied ïa ki nongïalam ba thymmai kane ka Association khnang ban ioh ban ïa pyntyllun ïa kiba bun ki kam kiba dei shaphang ka jingpynkha tnad ïa kane ka seng wat sha ki District bapher bapher ka jylla bad ka thong kaba hakhmat hi ka long ban khot ban wer ïa ki samla don sap na ka bynta ban ai jinghikai bad ban pynshai shaphang kane ka jingialehkai sport.
U la ong, ba ka Association ka sngewkmen ruh ba dei lyngba ka jingïarap ka Meghalaya Olympic ba ka Association ka la ioh lad ruh ban shim bynta ha ka North East Game ba ki 3 ngut ki la ioh khur ïa ka takma rnong, ha kaba wat la ka dei ka sien kaba nyngkong ka paw ba ki samla ka jylla ruh ki don sap ha kane ka kam ïalehkai sport ba la tip kum kata ka Weightlifting.
