Nongstoiñ, Ïaiong 23: Ka ophis jong ka District Sports Officer West Khasi Hills District Nongstoiñ, ryngkat ka jingkyrsanlang jong ka NDSA, ha ka 23 tarik u bnai Ïaiong 2025 ka la ïoh ban plie pyrda ïa ka 30th West Khasi Hills District Level Inter School Athletic Meet 2025, ha kaba 26 tylli ki skul napoh ka District ki la wan ban ïa shimbynta.
Ïa kane ka lympung, ka ban neh lai sngi lynter la pynlong ha madan Nongpathar Outdoor Stadium Pyndengrei bad ki don haduh kumba 952 ngut ki khynnah ki ban ïa shimbynta na ki 26 tylli ki skul. Kine ki kynthup 492 ngut ki khynnah shynrang bad 460 ngut ki khynnah kynthei.
Ha kane ka sngi plie pyrda ïa kane ka lympung ïalehkai u Bah S.Massar Executive Engineer PWD Roads Nongstoiñ Division Nongstoiñ u la long kum u kongsan, ha ka jingdon ryngkat lang ka Kong Balarina Syiem District Sports Officer West Khasi Hills, kiwei pat ki nongtrei sorkar, ki Principal, ki nonghikai bad kiwei pat ki nongshah khot sngewbha.
Shuh shuh ha kane ka sngi plie ïa kane ka lympung, la ïoh ïa ka jingïashim bynta shitrhem jong ki khynnah ha ki jingïalehkai bapher bapher ba kynthup kum ka jingïakop mareh kaba 100 meter jong ki under 18 kynthei bad shynrang bad kiwei kiwei de.
