Jowai, Ïaïong 22: Ka kynhun ïalehkai jong ka Ummulong CC kala pynliem ïa ka Mowkaiaw CYC ha kawei na ki jingïalehkai jong ka District Cricket League 2025 bala pynïaid daka West Jaiñtia Hills District Cricket Association (WJHDCA), ba la long ha ka 23 tarik ïaïong (sngi Balang) ha Mini Stadium, Khliehtyrshi.
Lah ban kdew ba ka jingïalehkai kala long kaba khlaiñ shilliang hapdeng ka Ummulong CC pyrshah ïa ka Mowkaiaw CYC, ha kaba ka Ummulong CC ka la jop kput haduh 136 ron. Ïa ka jingkynting toss la jop da ka Ummulong CC kaba la kam trai ban tied shuwa.
Ka Ummulong CC ka la lah ban kamai 193 ron na ki 30 ober bad khyllem 6 wiket. U Aaron Lamare ula lamkhmat napdeng ki nongtied da kaba kamai 63 ron marwei na ki 63 tylli ki bol kiba u la bynrap na ki 2 tylli ki Six (6s) bad khyndai tylli ki Fours (4s), u Rejoice Gassah u dei uwei pat u nongtied jong ka Ummulong uba dei seisoh da kaba noh synñiang 40 ron na ki 56 bol kiba u la bynrap da kawei ka Six (6) bad lai tylli ki Fours (4s).
Haba phai sha ki rangkawang bol jong ka Mowkaiaw CYC u Kishan Lyngdoh u la ïoh ban khur 2 wiket na ki 6 ober.
Haba wanphai ban beh ïa ka thong, ki nongtied jong ka Mowkaiaw CYC kim lah satia ban shan ïaka jingtbit jong ki nongkawang ball jong ka Ummulong CC ha kaba ki la khyllem uwei hadien uwei katba ka kynhun ka lah ban kamai tang 57 ron na bynta 10 wiket naki 15.4 ober. U Heimonlang Lyngdoh, nongkawang ball jong ka Ummulong CC u la tyngshaiñ bha ha ka bowling da kaba ïoh ban pynhap haduh 6 wiket na ki 5.4 ober bad khur syndon ïa ka khusnam Man of the Match.
Ka jingïalehkai mynta sngi Palei (24/04/2025) kan long hapdeng ka Khimusniang SC pyrshah ïaka Lion S&YA naduh ka por 9 baje mysntep.
