SHILLONG, ïaïong 23: Ka Sports Authority of India, STC, NEHU Campus Shillong kan plie paidbah ïa ka skhim ‘COME AND PLAY’ jong u snem 2025-2026 na ka bynta baroh ar ki khynnah shynrang bad kynthei.
Ka jingthmu ba kongsan jong kane ka Skim ka long ban pynjur ïa ki jinghikai na bynta ki khynnah samla ki ba sdang kiew ha ka kam ïalehkai, ban pynshlur ïa ka jingïashim bynta jong ki ha ki jingïalehkai bad na ka bynta ban pyndonkam hok ïa ki lad ki lynti kiba don.
Lah ban kdew ba ki tiar kiba don ha kane ka centre la thmu ban pyndonkam ha ka rukom kaba dei da kaba pynshlur ïa ki khynnah samla ka thaiñ ban pyndonkam ïa ka ha ka rukom kaba kham don jingthmu bad jingmut.
Katkum kane ka khubor ba la kdew haneng, la tyrwa ba ïa kane ka Scheme COME AND PLAY yn sdang noh na ka bynta ban ai jinghikai ïa ki khynnah samla (shynrang bad kynthei) kiba sngewtynnat ban ïalehkai ha ka dor kaba rit naduh ka 05 tarik u Jymmang, 2025 ter ter.
Kane ka skhim COME AND PLAY kan pdiang ïa ki khynnah kiba naduh 8 haduh 17 snem bad ki jingïalehkai ki kynthup ïa ka Archery, Football, Athletic, Boxing, Judo bad Karate, ha SAI ,STC, Shillong
NEHU Campus-Shillong,Mawlai.
