Nongpoh, Risaw 16: Kawei na ka lympung ïakynduh lang ki Khynnah skul ba la tip kum ka 61st General Conference bad ka All-India Schools Festival ba la pynlong da ka United Schools Organization ha University of Science and Technology, Meghalaya la lah ban plie pyrda noh mynta ka sngi bad ha kane ka lympung ïa phylliew jongmut ki khynnah skul ba la wan shim bynta na ki skul bapher bapher ka ri India kan neh haduh 4 sngi lynter naduh mynta ka sngi.
Ka phang pdeng jonng kane ka lympung jong u snem 2023 ka dei ‘United Nation’s SDG 3: A Global Commitment to Well-Being’ ba la wan shim bynta shitrhem ban sngewthuh halor ka jingkordor ka jingnang jingstad kaba dei katkum ka juk stad ba mynta.
Ïa kane ka lympung la wan ban plie paidbah da ka Nina Jain, kaba de ka Secretary General ka USO bad la sakhi lang ruh da ka jingdon lang u Sunil Kumar, Executive Council Member ka USO, u Mahbubul Hoque, Chancellor ka USTM, u Prof GD Sharma, Vice Chancellor USTM bad kiwei kiwei ki riew pawkhmat na ka tnad pule puthi nalor ki khynnah skul bad ki samla pule katei ka skulbah.
Haba plie ïa kane ka lympungbah ki khynnah pule, u myntri ka tnad pule puthi ka sorkar Meghalyaa, u Rakkam A Sangma, u la kren lyngba ka Video Recorded, ha kaba u la u la pynpaw ba kum kane ka jingïakynduh lang ki khynnah skul na ki skul bapher bapher ka ri India ka long kaba donkam bha ïa ki khynnah skul ba kin ioh ban lum jingtip ïa ka jingnang jingstad kaba dei katkum ka juk stad ba mynta.
U la ong ruh kum kane ka jingïakynduh lang ki khynnah skul kin ioh lum ïa ki jingtip bapher baher la ka long ban kyntiew ïa ka jingnang jingstad, ka riti ka dustur bad kumjuh ruh ban wan rah ïa ka jingïatylli kumno ban dang saindur ïa ka jingnang jingstad kaba ai jingmyntoi ïa ki khynnah skul.
Haba ai jingkren ruh ha kane ka sngi da ka Nina jain kaba dei ka Secretary General ka USO, ka la ong ba kum kine ki lympung ba la pynlong da ka USO ka long ka lad bad ka kabu ïa ki khynnah skul bad ki nonghikai na ki skul bapher bapher ba kin ioh ban shim bynta na ka bynta ban ioh lum jingtip ha ki bynta bapher bapher jong ka jingnang ka jingstad.
Ka la ong ruh haba pynlong ïa kum kane ka tamasa da ka USO kan ïarap ruh ban wan rah ïa ka jingïatylli jong ki skul ne ki jaka pule bapher bapher hapoh ka ri bad khamtam ba kin ioh lum jingtip naduh ki riti ki dustur bad ruh ban lah ban pynmih ïa ki khynnah kiba don sap ha ki bynta bapher bapher kum kita ki khynnah kiba wad ïa ka jingnang ka jingstad.
Lyngba jong kane ka sngi, da kaba shim ïa ki symboh pyrkhat ba la kren da u Dr. APJ Abdul Kalam, u Chancellor ka USTM, u M Hoque u la ai mynsiem bad pdiang sngewbha ïa ki khynnah skul ba wan shim bynta ha kane ka lympung bah ba la pynlong da ka USO bad u la kyntu ruh ïa ki khynnah ba lada ki angnud ban poi sha ka thong jong ka jingim ki dei ban sngewthuh ba kaei kaba ki iohi tang da kaba phohsniew ha ka jingtiah, hynrei kaei kaba ki angnud ka dei ban pynurlong da ki kam ym tang da kaba shu phohsniew ha ka jingthiah.
