Ka jingpluh jong ka ïing bad ka kudam ki Singhania ha Khyndailad, Thana Road ha ka sngi Saitjaiñ, ka pynpaw shai kdar ba katno ka long ka jingma kaba khraw ïa ki paidbah bad ïa ka nongbah hi baroh kawei, haba pluh ïing ha ki jaka ba khapngiah. Ban da dei ha ki jaka kiba kylluid, katei ka ïing kan nym jin da la shah bam duh ha ka ding, namar ba kadei ka ka jaka kaba jan ïa ki Fire and Emergency Services lane ki jaka ba don ki jaka pyllip ding, hynrei namar ka jingkhapngiah bad ka jingkhim ki surok, uwei u briew u la duh ei la ka jong ka jingim bad ki mar ki mata kiba da ki phew lak ne klur tyngka ki la ingkhong bad duh ei lut.
Kane ka jingjia ka pyni ruh ïa ka jinglong mutlop, ka jinglong kyllut jong ki nongñiah kali, ki paidbah kiba ym shym la ailad ïa ki kali pyllip ding ba kin rung sha kane ka jaka kaba khim bad kaba khapngiah ban leit pyllip ïa ka ding kaba la klang i shyrkhei bha. Ka paw shai ruh ba ki bor Pulit kiba dei ban tem ïa ka jingpluh ding, ki dang hap ban ïoh jinghikai shuh shuh, namar ha katei la hap ban ai jingïarap lang ruh da ki bor shipai kiba don ha ka jylla.
Kawei ruh ka paw ba ki Mock Drill kiba la pynlong da ki bor sorkar ha kine ki sngi baladep, kim pat ai jinghikai eiei ïa ki paidbah namar ha katei ka sngi haba la jia ka jingplud ka ïing, nalor ba kadei ka jaka kaba la khim bad khapngiah lypa da ki spah nguyt ki paidbah ki la ïa tur shajan ban long tang kum ki nongpeitkai ïa ka jingklang ka ding bad ka jingmih jong ka tdem kaba ïong. Ym shym la ïohi ba kin don ki briew kiban long kiba la kloi ban ïarap ha kaba kum katei ka por.
Kane ka jingjia ka kdew shai ruh ïa ka jinglong thurmur ka rukom shna ïing ha nongbah Shillog lane ka jingsynjor jong ki aiñ shna ïing ha kane ka nongbah. Ym tip la kane ka ïing ka don ne em ïa ki Fire Safety Measures ne kita ki lad jingïada haba jia ka jingpluh ka ïing. Hynrei ha kiba bun ki khep la ïohi na ka rukom shna ïing ha nongbah Shillong ka long ban shna ha la ka jong ka mon. Ym tip la ki aiñ shna ïing ka Meghalaya Urban Development Authority (MUDA) ka treikam ha kano ka rukom ha ki jaka kiba khapngiah kum kine.
Shu donbok ba ha kane ka jingpluh jong ka ïing ki Singhania, ki Pulit ki la trei shitom ryngkat ka jingïarap ki bor shipai, la lah ban tem ïa ka jingpur jong ka ding sha kiwei pat ki ïing kiba marjan ha katei ka jaka kaba ïakhah bha ki ïing ki sem, hynrei te kan jin da la long ka jingïam briew kaba jur lada ka ding na kane ka ïing ka la pur sha kiwei pat ki bynta ha kane ka thaiñ.
Ka nongbah Shillong ha ki snem ban wan, kan nym mad jingeh tang na ka jingkhapngiah bad sahkut kali, hynrei kan mad jingeh ruh na ka jingkhapngiah jong ki ïing ki sem, khamtam eh ki building kiba bun mala. Ha Khyndailad, laïohi ba kadei ka jaka kaba la khapngiah lypa ki ïing paki dulan ne ki building, pynban la ïohi ba ka sorkar, ki riew shimet ki la nang tei ïa ki ïing ki sem kiba bun mala.
Ka Meghalaya kadei ka jylla kaba jur bha ruh u jumai kumba la ju pynpaw da ki stad mei ramew na ka por sha ka por. Ym tip haduh katno kine ki building kiba la shna ki long kiba skhem ne kiba lah ba ïada na ka jingkhyllem lada jia wan tang jumai uba bym da jur than ruh. Nalorkata ka rukom tei ïa ki building ym tip la ka don ne em ka jingpeit bniah ïa ka rukom khleh ïa ka dewbilat, ka rukom thaiñ ïa ki nar rod, ka rutih thliew ban pynskhem ïa ki paia, ka rukom theh slep bad kiwei kiwei.
Kine kidei ki jingpeit bniah kiba kongsan bha ban lait na ki jingjia ba sngewsih haba wan ki jingpluh ding, ka jingtwa khyndew, ka jingkhyllem jong ki ïing ki sem bad kiwei kiwei de ki jingpynjulor na ki bor jong ka mariang ne ka jingleh khlem akor jong u khunbynriew. Ka ladei ka por ba ka sorkar bad ki paidbah kin kyndit bynriew noh. Lym kumta ka nongbah Shillong kan mad ïa ka jingïam briew bad ki jingjia ba sngewsih.
