Shillong, Rymphang 10: Ka NWCC bad ka Lawsohtun ki la pynthikna ïalade ban jam sha ka final haka lympung Shillong Cricket League Second Division 2024-25 ba la pynïaid da ka Shillong Cricket Association ha madan Urkaliar, Shillong. Ka NWCC ka la pynliem ïa ka Cluster CC da 6 wiket ha ka semi final ba nyngkong, nangta ka Lawsohtun ka la jop da 19 ron ïa ka Nongpdeng CC.
Hadien ba jop ïa ka jingkynting pisa (toss) ka Cluster ka la rai ban tied nyngkong hynrei ka la shah pynkut noh tang na bynta 107 ron naba khyllem baroh 10 wiket haka 17.5 ober, u Ankit Sharma (23 ron naki 24 bol) bad u Kasim Sun (18 ron naki 21 bol) kidei kiba la seisoh tam ha ka tied. U Arvind Singh Toha u la khur haduh 5/23 naki 4 ober katba u Lakhan Lal Das u la khur 2/16 naki 4 ober.
Haba wanphai ka NWCC ka la donkam tang 13.5 ober ban kynjoh ïa ka 108 ron bad hap tang 4 ngut ki nongtied ban pynsah sa 6.3 ober bad ban jop ïa ka jingïalehkai da 6 wiket. Napdeng ki rangkawang bol ka liang pyrshah u Gyandeep Kachari u la khur 1/33 naki 3 ober.
KI nongtied kiba la kyrshan borbah ha ka ban kamai ron na bynta ka NWCC ki long u Sonu Rynjah (47 ron naki 24 bol) bad u Lakhan lal Das (36 ron naki 39 bol) katba ïa ka khusnam Player of The Match la khur da u Arvind Singh Toha uba la tyngshaiñ ha ka bol da kaba khur 5 wiket.
Ha ka semi final kaba bud, ka Lawsohtun ka la shimti ban tied nyngkong bad ka la lah ban kamai 142 ron haduh kaba kut jong ka 20 ober bad hap 4 wiket. U Hilarious Thabah u la thlieh 65 ron naki 43 bol, katba u Manchester Pathaw u la kamai 38 ron naki 43 bol. U Donboklang Hookon u la khur 2/29 naki 4 ober ha ka bol.
Haba pyrshang beh nadien ka Nongpdeng ka la khyllem lut baroh 10 wiket tang na bynta 124 ron haduh kaba kut jong ka 20 ober, u Arnold Nongrang u la kamai 21 ron naki 20 bol.
Na ka liang ki rangkawang bol jong ka Lawsohtun u Nick Lyngdoh u la khur 3/29 naki 4 ober, katba u Hilarious Thabah u la khur 2/23 naki 4 ober ha kaba ka kynhun ka la jop ïa ka jingïalehkai da 19 ron. ïa ka nam Player of The Match la khur da u Hilarious uba la khur 2 wiket ha ka bol bad kamai 65 ron (not out) khlem da shah pynhap haka por tied.
